Meghalaya: KHADC Sweeper’s Lane-ah joint inspection huaihawt dawn

Khasi Hills Automous District Council (KHADC) chuan Thawhṭanni khan Sweeper's Lane dinhmun diktak zirchiang tur joint inspection team a din.

Joint inspection team-ah hian  Shillong Municipal Board, Directorate of Land Records and Survey leh Hima Mylliem te an tel a ni.

KHADC Chief Executive Member (CEM), Pynshngain N Syiem chuan Them Iew Mawlong (Sweeper’s Lane)-ah hian joint inspection an neih dawn thu sawiin he inspection hian sweeper lane dinhmun diktak hriatna kawngah nasa takin a pui dawn tih a sawi.

KHADC CEM chuan High Level Committee (HLC), state sorkar hnuaia din chuan Sweeper’s Lane-a land survey an neih dawn thu a sawi bawk.

Sweeper's Lane hi Sikh ho awm tamna hmun a ni a, helai hmunah hian rei tak buaina a awm tawh a ni. Tun thla tira Shillong buaina chhuah vang khan helai hmun hi ngaihmawh a ni lehzual a, eptu pawl Congress pawhin helai hmuna ram neihdan hi enfiah turin sorkar an lo nawr tawh a ni.

Hima Mylliem Acting Syiem, Ricky Nelson Syiem chuan Directorate of Land Survey and Record chuan survey a tharin an nei dawn tih a sawi a, hemi zulzui hian joint inspection pawh awlsam zawka kalpui a ni thei dawn niin a sawi.

Syiem chuan Gurudwara, Guru Nanak School, Shiv Mandir leh Durga Mandir sakna tur ram pek a nih thu a lo sawi tawh bawk a, 2010 khan NGO ṭhenkhatin an dodal avangin ram patta aṭang pawh hian inhnuhdawh an lo tum tawh thu a sawi. Mahse Sweeper Lane-a Sikh awm te chuan hei hi an dodal thu sawiin 2011 khan Court thutlukna angin ram patta hi an cancel leh tih a sawi.

Mi tam tak chuan Sweeper Lane aṭanga Sikh-te hi sawnchhuak turin an ngen ve bawk a, tunhnaia buaina chhuak avang khan nawrna a nasa lehzual a ni. Mahse Sikh lam hruaitu Jathedar Giani Harpreet Singh chuan helai hmunah  hian kum 180 zet Sikh-te hi an awm tawh thu leh sawnchhuak tura tihna chu an pawm theih loh thu an sawi ve thung a, hemi chungchangah hian Home Minister James Sangam pawh an hmu a ni.



Share this Post

Login to comment
No Comments