Guwahati tlangval thihna case-ah midang panga man leh

Assam-a Karbi Anglong district-a mipuiin Guwahati tlangval pahnih an sawisak hlum thubuai kal zelah Thawhṭanni khan Assam Police-te chuan mi panga an man belh leh.

Pathianni khan mi 16 an lo man tawh bawk a ni.

Assam police-te hian he thubuai chhui chiang tur hian Special Investigation Team (SIT) an din a, Indranil Barua, additional SP (HQ) in a kaihruai a ni. Barua ṭanpui tur hian midang pahnih ruat an nih bawk thu  SP (Karbi Anglong) V Siva Prasad Ganjala chuan a sawi.

Karbi Anglong-ah hian Nilotpal Das (29) leh Abhijeet Nath (30) te chu kar hmasa khan  Kangthilangso waterfall-a ornamental fish man turin  an kal a ni. Mahse khaw mipuite hian  naupang rukbo chingah ngaiin an lirthei lo tidingin an sawisa  a, an nunna hial an chan phah ta a ni.

An sawisa lai hi a sawisatu zinga mi pakhat hian video in a lo la a, social media lamah  a post aṭangin he thila inhnamhnawihte chu police-te hian an hriat theih phah.

Assam Chief Minister Sarbanada Sonowal pawhin pawikhawihtute lakah action an la ngei dawn tih a lo sawi tawh bawk a, Health Minister Himanta Biswa Sarma pawhin he tualthihna hi a dem thu  a lo sawi tawh bawk a ni.



Share this Post

Login to comment
No Comments