Tripura : Rorel lai BJP leh IPFT inkarah buaina chhuak leh tawh

Tripura-a ṭangrual sorkarna siamtu, Bharatiya Janata Party (BJP) leh Indigenous Peoples Front of Tripura (IPFT) te chu hmanni lawka IPFT in state hran an ngiat avanga an inkara buaina chhuakin ziaawm lam a pan hnuah block advisory committee (BAC) chairman ruat chungchangah an inhmu thiam lo leh.

Kar hmasa lawka ruat thar, BJP leh IPFT state-level coordination committee chuan party pahnih inkara buaina chinfelna tur an ngaihtuah hnua BAC member 28 ruatchhuah a nih chungchangah state chhung hmun hrang hrangah IPFT chuan lungawi lohna an lantir leh a ni.

IPFT thlawptu pawl chuan Gomati district-a Killa block-ah tiamchin awm loin nawrh an huaihawt a, BJP leader leh MLA Rampada Jamatia, BAC chief atana ruat a ni chu an duh lo hle a, IPFT leader Krishnakanta Jamatia chu BAC chief-a dah tur hian an nawr.

West Tripura-ah pawh hemi avang hian IPFT mi 750 vel chu Thawhṭanni zing dar 10 vel aṭang khan Lefunga block-ah an pungkhawm niin superintendent of police Ajit Pratap Singh chuan a sawi a, Ranabir Debbarma aiin Rajendra Debbarma chu BAC chairman-a dah zawk tura an ngiat thu a sawi.

Khowai district-ah pawh IPFT thlawptu eng emaw zat chu Champahower police station kawtah pungkhawm in BJP nena intihbuai avanga an party hruaitu pathum an mante chu chhuah zalen tura an ngiat thu report chuan a tarlang bawk. Khowai SP Krishnendu Chakravertty chuan mi 350 vel an pungkawm niin a sawi.

BJP state vice-president Pratima Bhowmik chuan hemi chunchangah hian thuchhuah siamin advisory committee chuan BAC-ah hian mi 28 an ruat thu sawiin BJP mi 18 leh IPFT mi 10 an ruattih a sawi a, he list-ah hian a signature bakah  IPFT general secretary Mevar Kumar Jamatia signature pawh a awm niin a sawi a ni.



Share this Post

Login to comment
No Comments