Assam : ULFA chairman in Citizenship Bill duh lohna thlawp Eptu pawl hruaituin Special Session ngiat

United Liberation Front of Assam (ULFA) chairman Arabinda Rajkhowa chu Thawhṭanni khan Citizenship (Amendment) Bill, 2016 duh lohna lantirna, Thana Chariali hmuna neihah telin sit-in protest leh signature campaign neihnaah a telpui.

Arabinda Rajkhowa chuan sorkar laipuiin bill hi a pawm a nih chuan inremna zawnga an inbiaknaah pawh nghawng ṭha lo a nei dawn tih a sawi.

Zirtawpni khan Guwahati-ah ULFA hian Bill hi pawm a nih chuan inkahhai puan aṭangin leh inremna zawnga inbiakna aṭangin an inhnukdawk dawn tih an lo sawi tawh bawk. Zirtawpni-a thuchhuah an siam kha ULFA-ten Bill dodal zawnga thuchhuah vawikhat an neihna a ni nghe nghe.

Thawhṭanni khan Rajkhowa chuan Citizenship (Amendment) Bill, 2016 chu na taka an dodal thu sawiin ram leilung fate hmalam hun nghawng thei a nih thu a sawi. Bill hi pawm a nih chuan an culture, ṭawng leh identity chu dinhmun hlauhawmah  a awm thei dawn tih a sawi a, hemi a nih avang hian an pawm theih loh thu a sawi. Assam chuan pawnlam mi vanga buaina an tawh theih tawh loh thu a sawi bawk. 

ULFA chairman chuan remna zawnga inbiaknain a tum ber chu Assam mite himna tur a nih thu sawiin sorkar laipuiin Citizen Bill hi a pawm a nih chuan enge in biakna neihin sawngsawhlawtna a neih ang? tiin a zawt leh a ni.

Zirtawpni khan ULFA  general secretary Anup Chetia pawhin sorkar laipuiin Citizenship Bill hi a pawm a nih chuan remna zawnga inbiakna aṭanga an inhnuhdawh nghal dawn thu a sawi.

Bill hi pawm a nih chuan December 31, 2014 hma lama Afghanistan, Bangladesh leh Pakistan aṭanga lo lutte chuan Hindus, Sikhs, Buddhists, Jains, Parsis leh Kristian pawh ni se khua leh tui nihna an nei thei dawn a ni.

Hetih lai hian Assam Assembly-a eptu pawl hruaitu ber Debabrata Saikia chuan Pathianni khan Chief Minister Sarbananda Sonowal chu governor leh speaker-te hnenah Citizenship (Amendment) Bill, 2016 chunchanga special session nei tura nawr turin a ngen.

Congress MLA chuan Assam Accord 1985 humhimna tura special session neih a ṭul thu a sawi.

Saikia chuan CM chuan Assam mipui ten an duh ang a tihhlawhtlin theih loh chuan ban pawh a inhuam thu sawi mah se Assam mipuite duhna tihhlawhtlin a nih theih nan a bei ang tih a sawi loh thu a sawi. Hei vang hian he Bill chungchangah hian special session neih a nih theihna turin Chief Minister chuan governor leh Assembly speaker-te chu thurawn a pe tur a ni, a ti.

Citizenship (Amendment) Bill, 2016 hi dodalna a nasa hle a, dodaltu tam tak chuan he Bill hian Assam Accord a tichhe dawn niin an ngai a ni. Assam Accord hnuaiah hian March 25, 1971 hnu lama dan loa ramchhunga lo lut te chu eng sakhua pawh nise hnawhchhuah tur an ni.

Hetihlai hian Bengali tamna Barak Valley-a mi 315 chuan Joint Parliamentary Committee hnenah Bill hi pawm nise an duh thu an thehlut ve thung a, hetih lai hian state chhung hmun hrang hrang bakah hmarchhak hmundangah erawh chuan Bill dodalna hi a nasa hle thung.



Share this Post

Login to comment
No Comments