Hmarchhak-a Catholic bishop in Bharat Gaurav Award la

Arunachal Pradesh-a East Arunachal Miao diocese Catholic Bishop (Dr.) George Palliparambil chu April 13 khan  London British Parliament House of Commons-a ceremony-ah Bharat Gaurav Award hlan a ni.

Indian culture leh society chawisan duhtu NGO pawl pakhat Sanskriti Yuva Sanstha President Pt. Suresh Mishra chuan he award hi mahni thawhna field a cheṭha bik te hnena hlan ṭhin a nih thu a sawi. 

Award Committe president Pt Mishra chuan a lehkha thawnah Palliparambil chu India tana mi bik, mi entawn tlak leh midangte phurna thlen thei tu a nih thu a ziak a, ram tana mi chhuanawm a nih thu ziakin Screening Committee chuan “Bharat Gaurav Award" dawng turin kan thlang che a ni, a ti.

Bishop George chuan award a laknaah hian naupang te hriselna leh zirna kawng a ngaihpawimawh thu sawiin rinawm taka hnathawh a ngaihpawimawh thu a sawi bawk.

Bishop (Dr.) George Palliparambil (63) hi Alumnus of Salesian College Darjeeling, 1977 batch a ni a, Kerala-ah a piang thung a, hmarchhak hmun hrang hrangah kum 40 chuang hna a thawk tawh a ni.

Kum 2006 khan East Arunachal Pradesh-a Miao Bishop ni tura nemngheh a ni a, a bial chhungah hian school 47 a din tawh a, 2014 khan Namsai-ah Venerable Uktara Bethany College-a din tawh bawk.

Bharat Gaurav Award hi 2012 aṭang khan pek ṭan a ni tawh a ni.



Share this Post

Login to comment
No Comments