Meghalaya : GNLA mi 8 inpe

Meghalaya-a East Garo Hills-a biak-in pakhatah Pathianni khan hel pawl Garo National Liberation Army (GNLA) mi pariat chu an ralthuam neihte nen an inpe.

GNLA helte hi Akelgre khuaa biak-inah inpe in, Akelgre hi district headquaters, Williamnagar aṭanga km 10 vela hlaa awm a ni. 

Heng helte hi kohhran upa te hmaah inpe in anni hian nimin lam khan thuneitu hnena hlan an nih dan tur an lo ngaihtuah dawn thung.

An inpek bakah hian an ralthuam ken-  AK56 rifle pahnih, SMG pakhat, INSAS pakhat, .303 pakhat, .22 pakhat, Glock pakhat, wireless set hnih, 9 mm pistol pakhat leh silai mu eng emaw zar an pe tel bawk.

East Garo Hills SP, Ringrang TG Momin chuan hel inpete hi police-te nen pawh an inbiak tawh thu a sawi a, an pawl hruaitu Sohan D Shira thah a nih lai khan a bulah khan an awm ve thu a sawi.

An pawl hruaitu ber thah a nih takah hian awmdan tur an hre tawh lo nia sawiin, an inpe ta mai nia sawi a ni bawk.

Sohan D Shira hi February 24 khan Dobu thingtlang khuaah thah a ni a, NCP candidate Jonathone N. Sangma Williamnagar-a thah a nih aṭanga ni ruk hnuah Shira hi security force-te chuan an that ve leh a ni. Jonathone IED bomb hmanga thah a nih chungchangah hian GNLA-te hi mawhphurtu bera puh an ni.



Share this Post

Login to comment
No Comments