KNP venhimna turin hma la dawn : Assam Governor

Assam Governor Prof Jagdish Muhki chuan dan leh thupek kenkawh kawnga hma la tute chu sapel ṭhinte laka Kaziranga National Park venhim a nih theih nan theihtawpa hma la turin a ti.

Prof Jagdish Mukhi chuan khawvel puma Assam lar nachhan chu Kaziranga National Park leh samsak ki khat nei an awm vang a nih thu a sawi a, sapel ṭhin ten samak nasa taka an thah hian ramsa kha an that mai a ni lo a, state-in inchhuanna tur a neih ve an bei tel a ni, a ti. 

Golaghat district thuneitute nena Inrinni zana meeting an neih naah he thu hi sawiin Governor chuan, sapel ṭhin ten sa an kahhlum hi a tlem tial tial tih a sawi a, hetiang hi ni mah se venhimna kalpuitute chu inthlahdah mai lo turin leh uluk lehzual zawka venhimna kalpui turin a chah a ni.

Governor chuan district police-te pawh district chhung mai bakah state dang nen an inrina hmun velah remna leh muanna a awm theih nana hma chak taka la turin a ti bawk.

Hetih lai hian district chhunga security force-te chu remna a awm theih nana an hmalakna zawng zawng chu fakawm a tih thu a sawi.

District thuneitute nen chuan hriselna, tui intur chungchang, faina, zirna, kawngpui leh inbiakpawhna mai bakah lo neih dan chungchang te pawh an sawi ho bawk a ni.

Governor chuan Assam leh hmarchhak state dangte chuan hmun ṭha tak, ram hmasawnna thlen thei hmun an neih thu a sawi.

Mukhi chuan hmarchhak chu Act East Policy bakah Association of Southeast Asian Nations (ASEAN) ram te nena inlaichinna hlawhtling tak neih a nih theih nana kawng pawimawh tak a nih thu a sawi bawk a ni.



Share this Post

Login to comment
No Comments