Kuki Political issue chungchangah inbiakna nei, Interlocutor thar nei

Sorkar laipui, Manipur sorkar, United People’s Front (UPF) leh Kuki National Organization (KNO)-te chuan Kuki political issue chungchangah a vawi ruk nan Nilaini khan Delhi-ah inbiakna an nei a, he meeting hi Interlocutor thar AB. Mathur-a'n a kaihhruai a ni.

Sorkar laipuiin Interlocutor thar atana an ruat AB. Mathur hi Research and Analysis Wing (R&AW) Special Secretary ṭhin a ni a, Nilaini-a remna zawnga inbiakna pawh hi ani hian a kaihhruai nghal thu official report chuan a tarlang.

Kuki pawl te hian he meeting-ah hian Territorial Council din an ngiat niin report chuan a tarlang.

Manipur-a Territorial Council din rawtna draft outline-ah hian UPF thupuangtu Aaron Kipgen leh KNO Negotiator Dr. Seilen Haokip-ten an hming an ziak a, statehood an ngiatna chu rilrua dah reng chungin sorkar hnenah he draft outline hi an thehlut niin an sawi.

UPF thupuangtu Aaron Kipgen chuan remna zawnga inbiakna chuan hma a sawn hle niin a sawi a, June 15, 2016 aṭanga inṭan tawh Kuki Political issue kaihhnawiha Manipur Kuki-te dan hnuaia venhim an nih theihna tur kawng te pawh an sawiho niin a sawi.

Kuki National Front (KNF) General Secretary ni bawk Kipgen chuan Manipura community dang te nen inrem taka an awm theihna turin UPF leh KNO-te chuan sorkar laipui leh Manipur sorkar nena inremna an zawn thu a sawi bawk.

Hetih lai hian meeting neih hma January 6 khan UPF leh KNO te hian an inkara boruak hrang hrang awm chungchangah consultation meeting an nei a, pawl pahnihte hian politics buaina chu chinfel a nih theihna turin duh thuhmun an neih theihna tur an zawng a ni.



Share this Post

Login to comment
No Comments