Assam-ah Police leh mipui in nawrnaah mi pakhat thi

Assam Darrang District-a Dula-ah mi pakhat thih dan chungchangah mipui thinrim in police an tawng a, police leh mipui-te hi innawr buai a ni. Police lamin mipuite hnawh darh nana silai an hmehpuahnaah mi pakhatin nunna a chan tih Nilainia Police thuchhuah chuan a tarlang.   

Nunna chan an awm bakah hian innawr buainaah hian mi eng emaw zatin hliam an tuar bawk a, heng zingah hian Deputy Superintendent of Police (DSP), police official-te leh security force mi eng emaw zat an tel bawk niin an sawi. Buaina a chhuah zel loh nan Dhula leh a chhehvelah hian tiam chin awm lo in curfew an puang nghal a ni.

Police te chuan buaina chu an thunun tawh thu leh ziaawm lam a pan thu an sawi.

State sorkar pawhin thil thlen dan chungchang hi chiang zawka report turin an hriattir tawh niin an sawi bawk.

Buaina chhuah chhan hi thudawnna in a tarlan dan chuan Thawhlehni zan khan mi pakhat Hasen Ali chu Dhula police te hian thuzawhfiah turin an la a, kut an thlak avangin a nunna hial a chan phah a ni. Guwahati Medical College and Hospital-ah hruai ni mah se a nunna hi an chhan hman ta lo a ni.

He thilthleng vanga mipui lungawi lo chu Police station kawtah pungkhawmin Police Station chu lungin an vawm chiam a, police-te pawhin lo dang in buaina a punlun zel avangin mipuite hnawhdarh nan hian Police te chuan silai an hmetpuak ta a ni. Vanduai thlak takin silai mu hian mipui zinga mi Mohidul Islam chu fuh palhin ani hian a nunna a chan phah ta a, midang pakhat Ghulam Mustafa pawhin hliam na tak tuarin damdawiin lamah enkawl mek a nih thu police official-te chuan an tarlang bawk. 

Deputy Commissioner Ashok Kumar Barman chuan buaina chungchang hi chhui zui tura thupek an chhuah tawh thu a sawi a, he thilthlenga officer concern Ranjit Hazarika pawh an susupend thu a sawi.

Barman chuan mipuite chu an duh zawng zawng an tihsak hnua police station la bei hram an nih thu a sawi a, police official-te pawh an thiam lo a nih chuan hremna an pek ngei tur thu a sawi bawk.

Chief Minister Sarbanada Sonowal pawhin Additional Chief Secretary M. G. V. K. Bhanu hnenah he buaina chungchang report siam a thehlut vat tur in thu a lo pe tawh bawk a ni.



Share this Post

Login to comment
No Comments