Nagaland CM leh Rajnath Singh inkawm

Nagaland Chief Minister TR Zeliang chuan Union Home Minister Rajnath Singh chu Nilaini khan Delhi-ah a hmu a, Naga politics buaina chungchang an sawi dun. 

Chief Minister Zeliang chuan an state-a pawl hrang hrangten assembly election kalpui rih lo tura Prime Minister Narendra Modi-a hnena ngenna an thlen chungchangah hmalakpui turin Union Home minister hi a ngen. Zeliang chuan, Naga politic buaina chuan kum tam tak harsatna a lo siam tawh tih sawiin, chinfel a nih thuai theih nana chak zawka hmalak a ṭul thu a sawi. Hel pawl hrang hrangte chu inremna siampui thuai an nih theih nan sorkar laipui chu inbiakna kalpui turin a ngen bawk. 

Rajnath Singh chuan Naga hel - Nationalist Socialist Council of Nagaland-Isak-Muivah (NSCN-I-M) te chu inremna siampui thuai a beisei tih sawiin, inbiakna pawh a ṭul anga kalpui tura hmalak a nih tur thu a sawi. Sorkar laipui chuan NSCN-I-M te hi inremna siampui a duh a, chumi tihlawhtling tur chuan hma pawh lak mek zel a ni, a ti. T.R Zeliang-a rawtna hrang hrangte chu ngaihtuah a, hmalakpui a inhuam thu a sawi bawk. 

Nagaland hian assembly election a hmachhawn dawn a, inbuatsaihna pawh a kal chho mek. Hetih lai hian pawl hrang hrang pakua te chuan inthlan hi kalpui lo turin Prime Minister hnenah ngenna an lo thlen tawh a, buaina chinfel thuai a nih theih nan President’s Rule puan an phut thu an sawi bawk. Pawl hrang hrang zingah hian - Naga Mother’s Association leh Naga Hoho pawh an tel a ni. December 7, 2017 khan sortkar laipuiah hian rawtna thlen a lo ni tawh bawk a, politician te pawhin an hming an ziahhnan a ni. 

Sorkar laipui chuan August 3, 2015 khan NSCN-IM te hi 'Framework Agreement' a lo ziahpui tawh a, hemi rual hian Naga National Political Group paruk te chu inremna a siampui bawk. Mahse an inremna hi puanzar a ni lo a, hemi avang hian dodalna pawh a nasa hle a ni. Sorkar laipui chuan NSCN-IM hi inremna siampui tumin kum 1997 aṭang khan inbiakna hi a lo neihpui ṭan tawh a, tun thlengin inremna tluantling siam a la ni lo thung. 



Share this Post

Login to comment
No Comments