Nagaland, Manipur leh Arunachal CM ten lungrual taka chen ho duh

Hmarchhak state pathuma Chief Minister -TR Zeliang (Nagaland), N Biren Singh (Manipur) leh Pema Khandu (Arunachal Pradesh) te chu Thawhlehni khan Hornbill Festival, Nagaland-a neih mekah inkawmin lungrual taka ṭhenawm state te nena awm ṭha an tih thu an sawi.

Nagaland CM TR Zeliang chuan Hornbill Festivel chief guest leh guest of honour CM te pahnih bakah Assam Chief Minister Sarbananda Sonowal te nen lungrual taka hmarchhak state te chen ho ṭha an tih thu sawiin, ralmuanna ringawt pawh hian hmsawnna a thlen thei a ni, a ti.

Zeliang chuan hmarchhak state te chuan hnam tihdan phung inang tak tak kan nei tih sawiin kan hmel landan pawh a inang a ni, a ti bawk.

Manipur CM N Biren Singh pawhin Nagaland leh Manipur te chuan inzawmna tam tak an neih thu sawiin lungrual taka khawsak ho a pawimawh thu a sawi a, Act East policy pawh hmarchhak state ten a hlawkna an tel dawn thu a sawi.

Arunachal CM Pema Khandu chuan Hornbill Festival chu Nagaland hmel lanna mai ni lo in hmarchhak pumpui hmel lanna a nih thu a sawi. Pema Khandu chuan hmarchhak mi te hian khawvel mite hriata pho chhuah tur theihna tam tak kan nei a ni, a ti. Khandu hian Nagaland leh Arunchal-in inanaa tam tak an neih thu a sawi bawk a ni.



Share this Post

Login to comment
No Comments