International Tourism Mart 2017 Guwahati ah ṭan

International Tourism Mart (ITM) vawi rukna chu Guwahati-ah Thawhlehni khan ṭan niin Assam Governor Jagdish Mukhi-a'n a hawng.

He mart hi hmarchhak state te leh Ministry of Tourism ṭangkawp buatsaih niin vawiin thleng hian neih a ni ang. Hawnna programme-ah hian Assam Chief Minister Sarbanada Sonowal, Union Tourism Minister KL Alphonse, hmarchhak leh sorkar laipui mi pawimawh mi eng emaw zat an tel a ni.

Tourism Mart hi "Act East Policy" bakah ASEAN ram te nena inthlun zawmna ṭha zawk neih theihna tinzawna buatsaih a ni a, India economy tihchangtlun zual leh khualzin mite tam zawka hip theihna ngaihtuah chu a tum ber pakhat a ni bawk.

Hmarchhaka khualzin mite hip theih dan tur te, Act East policy chungchang te sawiho a ni a, ASEAN ram te nena inkungkaihna ṭha zawk hmarchhak state te kaltlanga neih dan tur an sawi ho bawk.

ITM - 2017-ah hian Ministry of DONER pawh an tel a ni.

Buyers leh media palai ramchhung hmun hrang hrang aṭangin an kalkhawm a, ram dang aṭang pawhin mi tam tak lo kal bawkin hmarchhak sumdawng mi te kawmna hun an nei dawn a ni. Ram hrang hrang 28 -  Australia, Bhutan, Brunei, Canada, China, Cambodia, Cyprus, Fiji, Germany, Indonesia, Italy, Japan, Kenya, Lao PDR, Malaysia, Myanmar, Nepal, Netherlands, Philippines, Portugal, Singapore, Tanzania, Thailand, USA, UK, Vietnam, Turkey leh South Korea aṭangin stakeholder leh media mi te ITM hmang tur hian an lo fuankhawm a ni.

Ramdang mi bakah hian ramchhung hmun hrang hrang aṭangin stakeholder 50 an fuankhawm a, hmarchhak state aṭangin seller 103 an tel bawk.



Share this Post

Login to comment
No Comments