Manipur-ah buaina tam

Manipur-a social organization hrang hrang te chuan Krismas hmaa Framework Agreement (FA) a thu inziak puanzar a nih loh chuan buaina an chawk chhuak dawn niin an sawi a, kawngpui te pawh kal theih loh a danchah hial an tum.

Heng pawl hrang hrang te hian kum 2016 August thlaa sorkar laipui leh Nationalist Socialist Council of Nagaland - Isak Muivah (NSCN-IM) ten Framework Agreement an ziaha thu awm te puanzar a nih loh vangin lungawi lohna lantir an tum a, state chhungah buaina chawhchhuah an tum a ni.

Imphal West-a Thangemband area vela pawl pakhat Thangmeiband United Club chuan kar kalta Ningani khan Naga Framework Agreement hi puanzar a nih loh chuan Imphal khaw hmar lam aṭanga luhna ber kawng danchah an tum thu an sawi tawh bawk. Eptu pawl Congress party pawhin FA puanzar a ni lo hi nasa takin an lo sawisel fo tawh bawk a ni. 

Hetih lai hian Imphal East-a Peace and Development Coordinating Committee, Khundrakpam leh Saikul mi te chuan December 15 hmaa state sorkar in kawngpuite alkatra-a a luan hman lo a nih chuan km 40 a thui Imphal - Saikul kawng chu dan chah an tum ve thung. Committee General Secretary Th Hemjit chuan May thla daih tawh khan kawngpui siamṭha tura thupek hi chhuah tawh ni mah se tu thlenga hna ṭan a la nih loh thu a sawi.

Zeliangrong Baudi, Manipur (ZB-M) pawhin Assam Rifle te chu vauin, ni thum chhunga  Tamenglong district chhunga Tousem-a Kaimai Baptist Church compund an chhuahsan lo a nih chuan duh lohna lantir nan hma an lak dawn thu a sawi ve bawk a ni.



Share this Post

Login to comment
No Comments