Tripura BJP ten President Rule ngiat

Tripura Bharata Janata Party (BJP) te chuan Thawhlehni khan thuchhuah siamin, inthlan neih hma chu Tripura-ah President Rule hman an ngiat tih an sawi. Hei hi BJP activist ten tunhnaia beih an tawh vang leh state chhunga dan leh hrai kenkawhna lam a chak loh vang niin an sawi bawk.

Tripura BJP chief Biplap Kumar Dep chuan Thawhlehnia Agartala-a West Kotowali police station Left Front sorkar duh lohna an lantirnaah he thu hi sawiin, BJP thlawptu leh member tam tak Communist Party of India - Marxism (CPI-M) ten an sawisain an that a ni, a ti. CPI-M te hian an party office eng emaw zat an tihchhiat sak niin a sawi bawk a ni.

Kumar Dep chuan pawikhawihna thlenna hmun apiangah police te chuan chet an la ṭha lo nia sawiin, pawikhawihtute chungah pawh dan an lekkawh ṭha lo niin a sawi. Assembly inthlan ralmuang leh hlawhtling tak neih a nih theih nan President Rule kan ngiat a ni, a ti. Left Front te hian ro an rel reng a nih chuan inthlan hmain tualthahna a thleng leh ngei ang, tiin Dep chuan a sawi bawk. 

BJP te hian Left Front sorkar an duh lohna lantir nan Thawhlehni khan Tripura-a police station awm zawng zawng 76 zinga 56 bulah an pungkhawm a, Left Front te chu dan leh hrai kenkawhna kawngah an hlawhchham niin an sawi.

Inspector General of Police K.V. Sreejesh chuan BJP ten duh lohna an lantirna  “Thana Gherao” programme-ah hian tharum thawhna a thleng lo niin a sawi a, pungkhawm zinga mi eng emaw zat chu an man thu sawiin chhuah an nih thuai dawn thu a sawi bawk.

Hetih lai hian CPI-M Party te chuan BJP chet dan chu an dem hle a, mipui ten BJP chetlak dan chu an duh loh thu CPI-M Leader Narayan Kar chuan a sawi.



Share this Post

Login to comment
No Comments