Assam sorkarin sa pel ṭhinte chungchang thla tin ngaihtuah dawn

Assam sorkar chuan thuchhuah siamin, Kaziranga National Park humhalhna tur leh samak thah a nih fo avangin thla tin sa pel ṭhinte chungchang ngaihtuah a nih tawh dawn thu a sawi.

Chief Secretary VK Pipersenia chuan hemi chungchangah hian meeting koin, Deputy Commisioner (DC), Superintendent of Police (SP) leh Kaziranga chheh vela awm district panga - Sonitpur, Biswanath, Golaghat, Karbi Anglong leh Nagaon-a Forest official aiawhte an tel a ni.

Pipersenia chuan meeting-ah hian samak thah an nih fo avangin samak venhimna tur kawng hrang hrang an ngaihtuah thu a sawi a, District hrang hrang DC leh SP-te mai bakah, Forest hotute nen an duh dan leh ngaihdan an sawi ho tih a sawi.  A ruka sa pel ṭhinte chhuina leh an laka samakte venhim an nih theih nan thlatin meeting an neih dawn thu a sawi bawk.  Chief Minister Sarbananda Sonowal kaihhruaina hnuaiah Kaziranga Anti-poaching Coordination Mechanism din a nih dawn thu pawh a sawi. 

Kumin chhung hian Kaziranga-ah hian samak paruk thah an ni tawh a, heng zinga pali te hi tunhnai kar hnih chhunga thah an ni. Zirtawpni khan Nagaon District police-te chuan sapel thin mi pathum an man thu report a ni bawk a, heng an mi mante hian Nagaland khawpui, Kohima mi an nih thu an sawi ni a tarlan a ni a, heng an mi mante motor-ah hian ralthuam eng emaw zat man a ni.



Share this Post

Login to comment
No Comments