Assam sorkarin class XII zirlaiah GST telh dawn

Assam Higher Secondary Education Council (AHSEC) chuan tun academic year kal mek aṭang hian class XII exam-ah Goods and Services Tax (GST) a tel tawh dawn thu a tarlang. 

AHSEC Secretary Kamaljyoti Gogoi chuan Inrinni khan thuchhuah siamin, "Class XII zirlai, Economic subject late tan an syllabus-ah GST hi a tel tawh dawn  a ni" a ti. Gogoi chuan US-a Sam Houston State University Economic Professor, Hiranya Kumar Nath chuan SGT chapter a buatsaih dawn tih a sawi a ni. He chapter hi macro economic section-ah a beh dawn thu pawh a sawi bawk.

Gogoi chuan class XII zirlaia an telh chhan sawifiahin, zirlaite chu he chhiah lak dan thar chungchanga ngaihdan leh hriatzaunana petu tur a nih mai piah lamah, mipuite zinga hemi chungchanga buaina awm te chinfelna kawng a nih theih dawn vang niin a sawi. 

Tun academic session class XII exam-ah pawh GST hi a tel nghal dawn tih sawiin mark 5-10 inkar hemi lam hawi hi a chhuak dawn a ni, a ti.

Nikum December-a Lok Sabha-in  Constitution Amendment Bill a pass hnuah, Assam hi ramchhunga GST Bill pawm hmasa ber a ni. Kar liamta Ningani leh Zirtawpni khan Union Finance Minister Arun Jaitley hoin Guwahati-ah state hrang hrang finance minister-te leh Chief Minister ṭhenkhatte chuan GST Council meeting an lo nei tawh bawk. 



Share this Post

Login to comment
No Comments