Rel kawng dan vangin rel service a buai

All Bodo Students' Union (ABSU)-te chuan Thawhlehni khan Assam leh state dang inkalpawhna rel kawng an dang a, hei vang hian Northeast Frontier Railway (NFR) chuan rel service lai 20 chuang an dintir a ni. Rel service tihtawp lailawk a nih vang hian khualzin sang chuang zet chu an tangkhang a ni. 

ABSU-te hian rel kawng an dan chhan hi hun rei tak aṭanga an nawr tawh, Bodoland state nawrchhuah an tumna hmanrua a nih thu, NFR offical-te chuan an sawi. NFR official Pranav Jyoti Sharma chuan, Alipurduarh Division hnuaia Kokrajhar-ah leh Rangiya division hnuaia Dhekiajuli Road station-te chu Thawhlehni zing dar 5 aṭang khan khar a nih thu a sawi. Hei hian rel 20 chuang a nghawng thu sawiin, ABSU supporter 14,000 aṭanga 15,000 vel he rel kawng dang tura an thawhchhuah thu a sawi bawk a ni.

Bodoland state pek phut hian ABSU leh pawl ṭhenkhatte chuan October 10 aṭang khan ṭan an khawh thar leh a, rel kawng dan hi an hmalakna hmasa niin sorkar lamin aw a chhuah loh chuan November aṭangin Bodoland Territorial Areas Districts (BTAD) chhungah tiam chin awm loin insumdawn tawnna danchah vek an tum thu, an thuchhuah chuan a tarlang a ni. 

An thil phut tihlawhtling tura nawrnaah hian ABSU, National Democratic Front of Bodoland (NDFB)-te leh Peoples’ Joint Action Committee for Bodoland Movement (PJACBM)-te chu an thawkho a ni.



Share this Post

Login to comment
No Comments