Arunachal : SUMAA-te'n sorkar thutlukna dodal

Arunachal Pardesh-a zirlai pawl pakhat, Students' United Movement of All Arunachal (SUMAA) chuan state sorkarin Tibetan Rehabilitation Policy, 2014 kalpui tura thutlukna a siam chu an duh loh thu an puang. 

Sorkar-in Tibetan Rehabilitation Policy kalpui tura thutlukna a siam chungchang chu an pawm thei lo tih sawiin, Thawhlehni khan zirlai pawlte hian kawng an zawh a ni. Kawngzawhte hian Ganga aṭanga Mithun Gate thleng banner leh poster-te kengin kawng an zawh a, policy an duh loh thu an auchhuahpui bawk. SUMAA chuan thutlukna lo siam tawh chu sut leh turin an phut thu leh, chak taka hma lak an phut thu an sawi. 

SUMAA thuchhuah chuan, policy hi kalpui a nih chuan Arunachal mipuiten an tuar dawn niin an sawi. SUMAA president Tagru Tame chuan, he policy hi sorkar lam hian a hnuhkir hma chu dodal zel an tum thu a sawi bawk. District thuneitute lam erawh chuan zirlai pawl chet dan hi dan kalh a nih thu an sawi ve thung a ni. 

India rama Tibetan awmna hmun tam lama pali-na ni mek, Arunachal sorkar chuan Tibetan Rehabilitation Policy, 2014 hi August 12 khan an lo pawm tawh a ni. Mahse hepolicy kalpui dan tur chungchangah hian Thawhṭanni khan ram mipuite ngaihdan leh duhdan an ngaihchan tur thu thuchhuah a siam. He policy hnuaiah hian Tibetan-te chu permit pein eizawnna an dap ve phalsak a ni dawn a, sorkar hna pawh an thiamnain a tlin chuan an zawng ve thei dawn a ni.



Share this Post

Login to comment
No Comments