CCS-in Karmapa-a'n Sikkim a tlawh phalsak (head)

Union Home Minsitry chuan Buddhist puithiam Karmapa Ogyen Trinley Dorje chu Sikkim a tlawh phalsak a nih thu sawiin, hei hi Cabinet Committee on Security (CCS)-in a pawmpui tawh thu a tarlang. CCS-ah hian Prime Minister Narendra Modi chu chairman a ni.

Home Ministry chuan Sikkim sorkarin a ngen angin, Karmapa chu chu Sikkim a tlawh phalsak a nih thu a tarlang a, hemi chungchang hi CCS chuan a ngaihtuah hnuah, a pawmpui tih a tarlang. CCS hi ramchhunga security thila thuneihna sang ber neitu a ni a, Karmapa-a'n Sikkim a tlawh phalsak a nih leh ni loh chungchang pawh hi a thutluknaah a innghat a ni. 

Hetih lai hian Sikkimese Buddhist, Karmapa hi East Sikkim-a Rumtek monastery a tlawh phalsak a ni lo thung. Sorkar laipui chuan kum 1994 aṭang daih tawh khan Buddhist puithiam-te'n Rumtek monastery an tlawh hi a lo khap tawh a ni. Sikkim sorkar chuan Karmapa Dorje (30)-a'n an state a tlawh phalsak turin ziakin a lo ngen fo tawh a ni. Buddhist puithiamte chuan Karmapa Dorje-a'n Sikkim a tlawh phalsak tur hian Union Home Minister Rajnath Singh chu kumin May thla khan an lo dawr tawh bawk. 

Karmapa Dorje hi Tibet-a piang niin, kum 14 mi a nih laiin Nepal aṭangin India ramah a rawn lut a ni. Amah hi Tibetan sakhaw puithiam Dalai Lama-a hnungzuitu a ni. 



Share this Post

Login to comment
No Comments