Assam-ah dan loa pemlut dangtu tur task force dah dawn

Minister of State for Home Affairs (MoS) Kiren Rijiju chuan Bangladesh aṭanga dan loa Assam-a lut ṭhinte veng turin Task Force dah a ni dawn tih  Rajya Sabha-ah a sawi. 

Minister Kiren Rijiju chuan sorkar laipui chuan Bangladesh aṭanga dan loa lut ṭhinte hi a ngaimawh hle tih sawiin, he mi titawp tur hian hma lak mek a nih thu a sawi. Assam-ah hian task force dah a ni dawn a, hei hian dan loa ramri kan ṭhinte ven kawngah nasa taka a puih theih beisei a nih thu a sawi. India leh Bangladesh sorkar chuan ramri kan ṭhinte chungchang hi an ngaimawh hle tih sawiin, bilateral meeting pawh neih a nih tawh a ni, a ti. 

Director General-level meeting pawh Border Security Force leh Border Guard Bangladesh-te'n an lo nei tawh tih sawiin, Home Secretary-level talk thlengin inbiakna hi neih a ni tawh a ni, a ti. Rijiju chuan, December 2016-a Home Secretary-level talk-ah khan India chuan Bangladesh sorkar hnenah dan loa ramri kan ṭhinte dang tura hma la turin a ngen a ni, a ti. Ramriah hian dan loa ruihhlo tawlhruk leh ralthuam tawlhruk a hluar hle tih sawiin, hemi titawp tur hian Bangladesh sorkarah ngenna thlen a ni a, India pawhin hemi dang tur hian hma lak a tiam thu a sawi bawk. 



Share this Post

Login to comment
No Comments