Manipur-ah Japanese Encephalitis vangin mi pasarih thi tawh

Manipur-ah chuan thosi seh aṭanga kai theih Japanese Encephalitis (JE) avangin  tun hnaiah mi pasarih an thi tawh. 

National Vector Borne Disease Control Programme, state unit-in a tarlan dan chuan JE avang hian mi pasarih an thih bakah, mi 83 chu enkawl mek an ni. JE hi a darh zel loh nan hma lak mek a nih thu sawiin, mipuite chu zan mutnaah thosilen zar ṭhin turin an ngen. Hetih rual hian chiaina tur a awm lo tih sawiin, fimkhur chuan he natna lakah hian inventheih nih thu an sawi. Thosi seh aṭanga JE veite hi hospital hrang hrangah enkawl an ni a, a vei thar an awm belh zel thu tarlan a ni bawk. 

Manipur-ah hian  Japanese Encephalitis bakah dengue leh swine flu-te chu tun hnaiah a vei hmuhchhuah thar leh an ni a, hemi chungchangah hian state sorkar pawhin chak takin hma a la nghal a ni. Chief Minister N. Biren Singh chuan emergency meeting a lo ko tawh a, Health Deparment chu chak zawka hma la tura ngen an ni. A vei tamna Churachandpur district-ah chuan beihpui thlak a lo ni tawh a, district hrang hrangah pawh kalpui zel tum a ni. Doctor-te chuan thingtlang leh hmun kilkhawr zawka awmte chu an awmna hmunah kal chilhin, Myanmar ramri depah pawh beihpui hi thlak a ni bawk. 

Health Minister L. Jayentakumar chuan Japanese Encephalitis, dengue leh swine flu-te hi a darh mek thu report an dawng tih a sawi a, doctor leh paramedic-te chu a hluarna hmunah tirh ṭhin an nih thu a sawi. A vei an pun belh zel lohna turin hma an la zel dawn tih sawiin, damdawi lamah harsatna an tawh thu a sawi. Hetih lai hian doctor ṭhenkhat chu kal tura tihna hmunah an kal loh avangin suspend an nih thu a sawi bawk. 

JE avanga thi eng emaw zat an awm lai hian, swine flu avanga thi pawh mi pahnih an awm tawh a ni. Health Deparment offical-te chuan thi zat hi chiang taka sawi theih a nih loh thu an sawi a, Hospital-a enkawlte chu an chinchhiah theih te an nih thu leh, mahni in lama inenkawl an awm bawk avangin, thi zat hi a danglam theih thu an sawi. Hetih rual hian Manipur-ah blood sample test-na hmanrua a awm loh avangin harsatna an tawh thu an sawi a, thisen test turte chuan state pawn an pan a ngai ṭhin tih an sawi. 



Share this Post

Login to comment
No Comments