Chhiat tawkte chhawmdawlna pek an ni ang : Rijiju

Union Minister of State for Home Kiren Rijiju chuan Arunachal Pradesh-a West Siang district huamchhunga tuilian tuarte chu zángnadawmna 

pek an nih tur thu kar kalta Inrinni khan a  sawi. 

Rijiju hian high-level central team-te chu helicopter hmangin tuilenna hmun hrang hrangte a fanpui a, harsatna tawkte chu chhawmdawlna pek 

an nih tur thu hi a sawi a ni. Union Minister hi NITI Aayog Joint Secretary Vikram Singh Gaur, Inspector General, National Disaster Response 

Force Ravi Joseph leh Home Ministry’s Disaster Management Director Gopi Chandra Chawania bakah sorkar mi pawimawhte chuan an 

ṭawiawm a ni. Rijiju chuan harsatna tawkte chu a tawrhpui thu sawiin, nunna chan chhungte leh thlai chingtute chu ṭanpuina pek an nih tur thu 

a sawi. Union Home Ministry chuan chhiat tawkte tan hian State Disaster Response Fund hnuaiah cheng vaibelchhe 51.48 a ruahman sak tih a 

sawi bawk.

Chief Minister Pema Khandu pawhin tun hnaia Laptap khua leimin avanga mi tam tak thihna thleng chu zirchian mek a nih thu a sawi a, nunna 

chan chhungte leh hliam tuarte pawh zángnadawmna pek an nih tur thu a sawi ve bawk. Prime Minister Narendra Modi pawhin chhiat tawka 

nunna chan chhungte chu cheng nuai hnih ṭheuh pek an nih tur thu leh, hliam tuarte pawh cheng 50,000 ṭheuh pek an nih tur thu a lo sawi 

tawh bawk. Leiminah hian mi 14 an thi a, midang eng emaw zatin hliam an tawrh bakah, chenna-in pariat zet chu a hnawl a ni. 

Hetih lai hian Nagaland-Manipur inkalpawhna Highway chu kar kalta Inrinni aṭang khan leimin nasa tak avangin kaltlang theih lohin a awm 

mek bawk. National Highway 29  hi Nagaland leh Manipur-te inkalpawhna kawngpui pawimawh tak a ni a, lirthei tangkhang eng emaw zat a 

awm.  Border Road Task Force-te chuan kawngpui siamṭhat hna hi an thawk nghal a, a tlang theih hun tur erawh hriat a ni lo. 



Share this Post

Login to comment
No Comments