Assam-ah tuilian avanga thi mi 59 awm tawh

Assam-ah chuan tuilian vangin mi 59 an thi tawh a, nunna chan hi an la punbelh theih thu tarlan a ni.  

Assam State Disaster Management Authority (ASDMA) chuan kar kalta Inrinni thleng khan tuilian leh a kaihhnawiha chhiatna thlengah mi 59 

an thi tawh tih an sawi a, a tam zawk chu tuia tlahlum an nih thu an sawi. Nunna chan zingah hian naupang leh hmeichhia pawh eng emaw zat 

an awm tih an sawi a, harsatna tawk an tam avangin nunna chan hi an la punbelh theih thu an sawi. ASDMA chuan tun dinhmunah tuilian tuar 

hi mi 11,93,458  vel an la awm tih an sawi a, district hrang hranga thingtlang khaw 1,795 vel zet chu tuilian hian a chimpil tawh tih an tarlang. 

Thlai chinna hmun pawh hectare 66,516 chuang zet a chim tawh an sawi bawk. 

Dhemaji, Biswanath, Lakhimpur, Sonitpur, Darrang, Nalbari, Barpeta, Bongaigaon, Chirang, Kokrajhar, Dhubri, Soputh Salmara, Golapara, 

Morigaon, Nagaon, Karbi Anglong, Golaghat, Jorhat Majuli, Sivsagar, Charaideo, Dibrugarh, Karimganj leh Cachar district-te chuan tuilian hi 

an tuar nasa zual a ni. Heng districta cheng mi 25,000 vel chu relief camp-ah an khawsa mek a, chenna tur nei lo pawh mi tam tak an awm 

bawk. Kaziranga National Park (JNP) pawh tuilian hian a chim nasa hle a, ramsa 70 vel an thi tawh  niin ASDMA report-ah tarlan a ni bawk. 

Kaziranga National Park ram chhung 70% vel zet chu tuilian hian a chim tawh a, ramsa te himna turin Agaratoli, Kohora, Bagori, Burhapahar 

leh Biswanathghat-ahte anti-poaching camp 93 siam a ni tawh bawk.  

State sorkar chuan tuilian tuarte tan hian ei leh in tur sem hna an thawk reng a, buhfai quintal 2,903.25 vel a sem chhuak tawh a ni. Heng bakah 

hian tui in tur thianghlim leh nitin mamawh sem zel a ni bawk a, medical team-te pawhin a hmunah an awmchilh a ni. Hetih lai hian 

Brahmaputra lui chuan Guwahati, Jorhat, Sonitpur, Goalpara leh Dhubri-ahte hlauhawm chhinchhiahna a la pel a a ni. Northeast, Railway 

Minister Suresh Prabhu chuan Assam aṭanga Arunachal Pradesh pana tlan rel ṭhenkhat chu tihtawp lailawk a ngai hial tih a sawi a, hei hian zin 

veivak tan harsatna nasa tak a thlen a ni, a ti. Harsatna tawh mek chungchang ngaihtuah hian Prabhu hian Railway Board official-te chu meeting 

a lo neihpui tawh bawk. 

National Disaster Response Force (NDRF)  leh pawl hrang hrangte chuan chhanchhuah hna an thawk mek a, minister leh MLA-te pawhin an 

bial chhunga harsatna tawkte hi an vil reng a, chhun zan zawmin chhannchhuah hna thawh a la ni. Hetih lai hian tuilian tuar hi an tlahniam ve 

zel a, ruah a sur loh chuan an harsatna tawh hian ziaawm lam a pan chhoh zel an beisei thu state sorkar chuan a tarlang. 



Share this Post

Login to comment
No Comments