MNYF-in party dang ṭhalai an chháng

Mizo National Youth Front (MNYF) chuan nimin khan thuchhuah siamin, ZPM Ṭhalai leh MPYCC-te thuchhuah an chháng a; Mizoram leh Assam ramri depa buaina chungchanga sorkar chêt dan chu chhuanawm an tih thu an tarlang bawk.

MNYF chuan, Virtual Anthurium Festival, 2020 hmang lo tura ZPM Ṭhalaiin sorkar an ngen chungchangah, Anthurium Festival chu kum tina sorkarin a buatsaih ṭhin a nih thu leh kuminah chuan hri léng avangin virtual-a hman tur a nih thu an tarlang a, "Felfai taka sorkar hotute'n ruahmanna an siam laia sorkar hmalakna hmu thei miah lo ni âwm taka ZPM ṭhalaiin an sawisel mai hi àwm lo kan ti," an ti.

Anthurium Festival hmanna tur sum chu sorkar laipui aṭanga dawn vek a ni tih sawiin MNYF chuan, "Mizoram sorkar sum hman a ni dawn lo a, a hman dan tura an sanction ang bâka hman theih a nih loh avangin thil danga pawh pên theih loh a ni," an ti a; ZPM ṭhalaite chu sorkar hmalakna an thláwp thiam lo a nih chuan ngawih zir turin an chah.

MPYCC-in November 9, Thawhṭannia minister of state Lalruatkima laka CID (Cyber Crime)-a FIR an thehluh chu nuihzatthlak an tih thu sawiin MNYF chuan, "Wikipedia chu a duh duh tan edit theih a ni. Hei vang hian FIR thehluhna tur khawpin kan Minister hian tihsual a nei lo a, a thehluttute hian an thil tih an hriat chian loh vangah kan ngai," an ti.

MNF ṭhalaite chuan, minister Lalruatkima'n sceenshot a post nia sawi chu October 25, 2020 khan mobile phone aṭangin mi tu tih hriat lohin a edit thu leh, tunah chuan a ngai anga siam ṭhat a nih leh tawh thu an sawi bawk.