Krismas leh Kumthar
Covid-19 chungchanga sorkar mi pawimawh, kohhran hruaitute leh NGO hruaitute ṭhukhawm chuan Krismas lo thleng tura Mizoram inbuatsaih dan tur sawiho a ni a; Krismas hunpuiah kohhrante chu inkhawm, zaikhawm leh ruaiṭheh huaihawt lo tura ngen an rél a; hunpui thleng turah tih tur leh tih loh tur kaihhruaina duan chu State Disaster Management Authority hnuaia State Executive Committee kutah an dah.
Mizo Kristiante hun pui ber nia sawi theih chu Krismas leh Kumthar hi a ni a, he hunpui hi kum tluana Mizote'n kan nghah ṭhin a ni. Hunpui thleng tur atan hian hun rei tak kan inbuatsaih a, kohhranin ruahmanna a siam a, sorkar leh khawtlang pawh a inbuatsaih a, chhungkua leh mimal pawh a inbuatsaih ṭhin.
Covid-19 hripui avangin kumin chhungin khawvel a buai a, Mizoramah pawh kan tih ṭhan tam tak chhunzawm theih a ni lo a, kan tih ngai loh tih thar a ṭul a, kan awm dan nasa taka tihdanglam a ni. Pathiannia inkhawm a remchang lo a, eizawnna tam takin a tlakchhiat phah a; tunah chuan kan hun pui ber pawh kum dang angin kan hmang thei dawn lo tih a chiang ta.
Kan duh loh thil mah ni se, kan hun tawnin a zir miau loh avangin lawm takin thuneitute ruahmanna siam hi kan zawm mai a ṭul a, heng hunah tak hian fimkhur a ṭulzia kan hriat chhuah a ṭha awm e. Tun hnaia hri darhna lian tak nia mithiamte sawi chu puipun hut hutna ni lem lo, tlem tham deuha inhmuhkhawmnaah a ni a, hei tak hi kan insum a ṭul dawn.
Mi tam tak chuan kum dang anga Krismas leh Kumthar lawm a remchan loh avangin mahni chhungkaw bil te, ṭhian hnai leh ṭhenawm khawveng insawm khawma lawm an rawt mai thei a; nimahsela hei hi Covid-19 tidarhtu a ni thei a, kohhran programme pawh duang lo tura kan inngen lai hian remchanna laa hunpuia inhmuhkhawm leh chaw ei khawm lam kan uar palh ang tih a hlauhawm hle.
Inkaihhruaina tur duangtute pawhin heng thil thleng thei veng tel thei turin ruahmanna siam se, kan hunpuia kohhran leh khawtlang huapa punkhawm a rem loh lai hian, a huam zim zawka punkhawm kan nei leh sup sup a nih si chuan Krismas leh Kumthar lawm lo tura kan inngen chhan Covid-19 hripui hi kan tidarh chiam palh ang e.