Hel pawlin an vau vangin Manipur-a media house khar

Hel pawlin an vau avanga lungawi lohna lantirin, Manipur-a media house-te chu Nilaini khan khar a ni. 

Media house-te vau an nih avang hian Imphal-ah lungawi lohna lantir a ni a, hemi ni hian tualchhung chanchinbute tihchhuah a ni lo a, local cable network-te pawhin chanchinthar an tichhuak lo bawk. 

United National Liberation Front –UNLF hnuaia pawl pahnih chuan an pawl thuchhuah siam chanchinbu lama tihchhuah  chungchangah an ngaihdan a in ang lo a, a hran ve vein media house-te hi vauin, journalist-te chu an thupek zawm turin an ti a ni. Group pakhat hian Central Committee tih hmingin an thuchhuah chu chanchinbua chhuah lo tura an hriattir laiin, group dang, Chairman hming chuanna chuan chhuah  turin an ti thung. Group pahnihte hian an thupek hi zawm turin an vau ve ve a ni.

Vauna an tawh avang hian media house-te chuan Nilaini khan chanchinbu an tihchhuak duh lo a, All Manipur Working Journalists' Union (AMWJU) leh Editors' Guild Manipur chuan Manipur Press Club-ah joint meeting neiin, helpawlin an vau chungchang hi an sawiho. Meeting chuan helpawl hnuaia group pahnihte chu an inhriatthiam lohna chu chinfel hmasa tur leh, media house-te an vauna pawh sut turin an phut.  

Journalist leh media house-te hnathawh tibuai lo tura ngenin, AMWJU leh EGM member-te chuan meeting zawh hnu hian Manipur Press Club compound-ah sit-in protest an huaihawt nghal a ni.