RS MP chuh turin mi 3-in hming an pe

June 19, 2020-a Rajya Sabha MP inthlana chuh turin nimin khan returning officer H Lalrinawma, Legislative Assembly secretary hnenah mi pathumin nomination an thehlut. Nomination-te hi vawiinah endik a ni ang.

Rajya Sabha MP inthlan atana nomination nimina hming pete chu - Mizo National Front (MNF) can­didate aṭangin K Vanlal­vena, Indian National Cong­ress (INC) candidate Dr Lal­lian­chhunga leh Zoram Peo­ple's Movement (ZPM) can­didate B Lalchhanzova te an ni.

MP chuh tura nomination thehlutte tan June 12 thleng inhnuhdawhna hun hawn a ni a, June 19, Zirtawpni zing dar 9 aṭanga tlai dar 4 inkarah vote thlak theih niin, tlai dar 5-ah vote chhiar nghal a ni ang.

Thuthar thehdarhtute zawhna chhangin K Van­lalvena chuan, ruling party nih lai chuan Rajya Sabha MP nih duh an tam ṭhin avangin candidate nih a inbeisei ngam loh thu a sawi a, "Ka châk a, duh pawh ka duh. Mahse, kan party-ah kei aia ram leh hnam tana tuar rei tawh zawk, thawh hlâwk zawk leh senior zawk an tam avangin ka duhna ka tilang ngam lo," a ti.

K Vanlalvena chuan, amah aia candidate phû zawk an tam thu sawiin, "Candidate ka nih tâkah chuan, eng tham ni lo mah se, ram leh hnam tan kan lo thawk ve ṭhin. Tunah chuan ram leh hnam tana thawk lehzual turin hun a inhawng dawnah ka ngai," a ti a, candidate tura amah thlangtu an party hruaitute chunga a lawm thu a sawi.

B Lalchhanzova chuan zawhna chhangin, an party hruaitute'n uluk taka an ngaihtuah hnuah candidate tur an thlan thu a sawi a, "Nikum maiah Election Commission of India-in party-ah min pawm a, MLA inthlan hnuhnung berah mipuite'n min rin tâwkna tilangin MLA pasarih lai min pe a ni," a ti.

ZPM tan Rajya Sabha MP inthlan hmasa ber tur a nih thu sawiin B Lalchhanzova, "Kum 2023 MLA inthlan lo awm turah ZPM-in sorkarna a chan ngei theihna atan ZPM rintlakzia lantirna atan pawh MP chuh ngei ṭulin ka hria a ni," a ti a, an party hruaitute'n candidate tura an ruatna chu lawm taka a pawm thu a sawi.

Thuthar thehdarhtute zawh­na chhangin Dr Lallian­chhunga chuan, tling lo tura ngaih ni mah se, an party-in a tìr aṭangin chuh loh an ngaihtuah ngai loh thu a sawi a, "National party kan ni a, central-ah chuan Hindu kulmûk rama India ram din tumtute'n ro an rél a, chu chu Mizorama sorkarna chelhtute'n an thawhpui a ni. Central sorkar hian India ram inunauna tichhe thei zawngin hma an la a ni," a ti.

Dr Lallianchhunga chuan, Covid-19 léng lo se chuan central sorkar duh loh lantirna atan mipui an chêt chhuah tur thu sawiin, "India rama BJP rorel dan duh loh lantirna pakhat chu democracy ramah chuan inthlan chuh hi a ni," a ti a, democracy-a innghat party an nih avangin dinhmun tur hre sain huaisen taka inthlan an chuh thu a sawi.