Match 1000 chak thei Nadal

Rafael Nadal chuan professional tennis huangah match 1000 zet hnehna a chang thei ta. Mel lung pawimawh phun tur hian amah ang bawka Spanish player Feliciano Lopez chu Paris Masters second round-ah 4-6, 7-6 (7-5), 6-4 in a hneh.

Nadal hma hian American legend Jimmy Connors (1,274 wins), Roger Federer (1,242) leh Ivan Lendl (1,068) te chuan mel lung ropui hi an lo hmu phak tawh a, match 1000 chak thei player hi pali an awm ta.

Kum 34 mi Nadal hian thla hmasa khan French Open nomawi chu a vawi 13 nan a chawi a, Grand Slam title lak hnem lamah pawh Federer (20 titles) a nih rual tawh, sulhnu ropui a la hnutchhiah zel dawn niin a lang.

Nadal chuan, "Hetiang dinhmun thleng tur hian ka zin kawngah paltlang ka ngah hle. Kum 34 thlenga inkhelh theih hi mimal thil tih mai a ni lo, keimah bakah chhungkua leh team pumpui thawhrah a ni," a ti.

Spanish tlangval hian 2002 khan Mallorca Open-ah kum 15 mi chauh niin hnehna a chang ṭan a, tun thlenga a hneh ngun ber chu Novak Djokovic niin match 27 a hneh tawh - Serbian tlangval lakah hian ṭum 29 a chak lo thung.

Djokovic bakah hian David Ferrer (26), Roger Federer (24), Tomas Berdych (20) leh Stan Wawrinka (19) te chu a hneh ngun zual an ni.

Nadal hian a match lehpekah chuan Jordan Thompson a hmachhawn leh ang, inkhel dangah seeded palina Alexander Zverev chuan Miomir Kecmanovic 6-2, 6-2 a hnehin third round a inhlangkai ve bawk.