SC-in ultraviolet ray leh disinfectant hman khap turin a hriattir

Supreme Court chuan nimin khan sorkar laipui hnenah Covid-19 laka invenna atana mihringa ultraviolet ray leh disinfectant (natna kai theih laka chemical hmanga inthen/phuh faina damdawi) hman khap turin a hriattir. Hemi chungchanga thil ṭulte chu thla khat chhung ngeia buaipui turin a ti bawk. 

Chief justice of India Ashok Bhushan kaihhruai bench chuan mihringa ultraviolet ray leh disinfectant hman ṭhin chu khap turin phut a, Gursimran Singh Narula-a'n PIL  a thehluh chu a ngaihtuah a ni. 

September 7 khan SC chuan disinfectant hi mihring tana hlauhawm a nih avangin ṭha a tih loh thu a lo sawi tawh a, office ṭhenkhatah anmahni dawrtute chu disinfectant hmang hian phuh a nih ṭhin thu a tarlang. Hei hi eng vangin nge sorkar laipui chuan a khap loh tih leh, hetianga an lo phuh ṭhin hian taksa bakah rilru lam thlenga a nghawng theih thu pawh a lo sawi tawh. 

Solicitor General Tushar Mehta chuan court hnenah hian Health Ministry-in Covid-19 laka invenna atana mihringa disinfectant hmang chungchangah eng kaihhruaina dan mah a la siam loh thu alo hrilh tawh a ni. 

Sorkar laipui chuan June thlaa expert committee meeting, Director General of Health Service hoa neih chuan disinfectant hmanga mihring phuh chu a thlawp loh thu leh, hetianga inphuh hian an mi phuhin droplets leh contact hmanga hri a tidarh tur a ven phah loh thu an lo sawi tawh a ni, a ti.