KHAWTHLIR
THISEN PE
Mumal takin blood donation camp neih theih a nih rih loh avangin Association for Voluntary Blood Donation, Ser chhip Branch leh Serchhip District Hospitalin an ngen angin nimin khan Serchhip Vengchunga mi paruk leh Chhimvenga mi palite'n Blood Bank-ah thisen unit 10 an pe.
COVID KAI LO
Aizawla Accountant General office-a thawk senior audit officer Madhurjya Bhuryan (36), March 29, 2020-a Mission Venga a in luaha thia hmuh chu a throat swab sample endik a ni a, Covid-19 a kai lo tih finfiah a nih thu nimina sorkar thuchhuah chuan a tarlang.
PHUR ZEL DAWN
FCSCA secretary HL Rochungnunga hoin nimin khan April 1, Nilainia Hunthar Veng Local Task Force leh police duty-te leh Mizoram Truck Owners Association hruaitu inkara inhmuh thiam lohna thleng chungchang leh a kaihhnawiha thu chhuah awmte sawiho a ni. MTOA chuan mipui tan ṭha taka an hna thawh chhunzawm an tum thu an sawi.
RAN ENTIR THEIH
AH&Vety department enkawl State Vety Polyclinic Hospital chuan, Covid-19 hri léng vanga inkhârkhip laia ran vulhtute'n ran damlo enkawlnaah harsatna an tawh loh nan department ambulance hman theih turin an ruahman. Ran damlo (emergency case) neite chu phone number 9402113053 leh 9436149549-ahte inhriattir turin an chah a ni.
DUTY-TE NGEN
Food, Civil Supplies & Consumer Affairs (FCSCA) department chuan, sorkar laipuiin a phal angin mipui ni tin mamawh (essential commodity) phurtu leh buaipuitu bakah, chumiin a kaihhnawih thawktute - truck driver te, truck neitu te, motor lian part zuar leh workshop-a thawkte'n an motor lak chhuah, pawisa lak, POL lak leh a ṭul huna dawr leh workshop hawng tura an veivahte phalsak an nih thu an tarlang. A theih anga lo pui a, an harsatnate sutkiansak turin task force duty, traffic leh police duty-te a ngen a ni.
PSYCHOLOGICAL AND SOCIAL GUIDANCE
Health & Family Welfare department chuan April 1, 2020 khan Covid-19 Committee on Psychological & Social Guidance a din. Committee-ah hian convener chu Prof. Zokaitluangi, MZU-a Psychology department HoD a ni a, coconvener chu Pachhunga University College Sociology department HoD Lallungmuana a ni; member dang pakua ruat a ni bawk.