Foreigner dap chhuak tura hriattirna Sorkarin a bawhzui - Home Minister

Home minister Lalchamliana chuan Opposition group leader Lalduhoma zawhna chhangin, central sorkarin Ministry of Home Affairs lehkha hmanga foreigner-te dap chhuak a, dan anga action la tura ṭum hnih Mizoram sorkara hriattirna pek tawh chu bawhzui a nih thu House a hrilh.

Home Minister sawi danin, MHA aṭanga lehkha dawn bawhzuiin Mizoram sorkarin Bangaldesh ramri depa awm district pathum - Lunglei, Lawngtlai leh Mamit-ahte Special Task for Detection, Detention and Deportation of Illegal Bangladeshi Migrants a din a; task force-te thláwpa hmalaknate tichak turin sub-divisional level-ah special task force a din bawk.

Bangladesh ramri dep loa awm district dangahte chuan foreigner dap chhuah, man leh hnawhchhuah hna chu district police kuta dah a ni.

MHA aṭanga foreigner man/hnawhchhuah chungchanga lehkha dawn zawng zawngte chu a kaihhnawih department/office-ahte a ṭul anga bawhzui tura thawn chhuah a ni. Mizoram luhka hrang hranga duty-te chu MHA aṭanga thudawnte bawhzuia hma la chhunzawm tura hriattir nghal an ni bawk.

Foreigner, dan anga Mizoram tlawh tura lo zinte chu an chàm theih hun chhung tur bituk aia rei an awm loh nan Mizoram sorkarin a en zui a, dan loa foreigner rawn lutte chu hnawhchhuah an ni. Kum 2018-2020 chhungin dan loa Mizorama lut mi 330 man an ni a, chu'ngte chu Rohingya ráltlân, Bangladeshi leh Nepali-te an ni.