Lockdown leh curfew hnuaiah Aizawlah pawn chhuak an tam

Vanglaini palaiin Aizawl khawpui hmun hrang hranga police leh traffi c police duty a kawmte chuan tun hnaiah pawn chhuak an tam thu hi an sawi hlawm a, "Phalna nei lo chu an awm mang lo. Local level task force aṭanga phalna nei an tam hle a, lehkha an neih miau chuan keini tan lo dan ngawt theih a ni lo.

Phalna nei si, veivak zingah tleirawl an tam hle ," an ti. Police-te sawi danin, tun hnaia pawna vak chhuak zingah hian sorkar hnathawk pawh an tam a, anni ho hian an department batch awrh avanga an hotute'n duty tura an tih chin an hriat ve si loh avangin lo dan ngawt theih a ni lo.

Police duty pakhat chuan chhunahte sorkar hnathawk an veivak nasa lutuk chu mak a tih thu sawiin, "Office kai tur bik tlemte ruat an ni a, chungho pawh offi ce-a hnathawk tura kal tura tih an ni. Hetiang a nih laia chhuna department hrang hrang badge awrh an tei suau suau hi a ngaihna pawh kan hre tawh bik lo," a ti. Mizoram sorkar chuan lockdown chhunga sorkar hnathawkte pisa kai dan turah March 22, 2020 khan ruahmanna siamin, secretary, head of department leh head of office-ten loh theih loa pisa kai tur chin an ruat a, a bak zawng chu in lama hnathawk tura tih an ni. Hei hian dan leh  thupek kengkawhtu leh medical lama duty erawh a huam lo.

Aizawl khawpuia police duty-te chuan vak chhuak zingah hian local task force badge bel pawh an awm nual thu sawiin, "Badge bela mahni veng ni loa veivak an awm nual. Chawhmeh leh ṭul dangte buaipui tur ni lo tih hriat, mahni chauha two wheeler hmanga veivak an awm ṭhin," an ti a; task force badge chu veivah phalna anga ngaia mimal thila lêng kual nia rinhlelh tur an tam thu an sawi.

Hetihlai hian curfew puan a nih chhunga chhuah phalna lak theihna Aizawl DC pisa-a thawktute chuan Vanglaini palai zawhna chhangin ni khatah chawhrualin mi 50 vel chhuah phalna an pek ṭhin thu an sawi a, "Dilna lut tam ber chu ei leh in tur ngaihtuah duh leh damlohna thilah a ni," an ti a, dilna zawng zawng an pawmsak loh thu an sawi. Aizawl DC pisa-a thawktute chuan chhuah phalna dil tur hian local task force, YMA leh local council-te hriat puina an neih a ngai tih sawiin, "Khawi emaw ber nei lo chu phalna kan pe lo hrim hrim.

Rinhlehawm deuh nia kan hriatte pawh kan pe lo. Hriatpuina engmah nei lote pawh an lo kal tho a, engtin nge kan offi ce an rawn thlen theih kan hre bik lo," an ti. Prime Minister chuan March 22 kha India ram pumah 'Mipui Curfew' a puang a, Mizoram sorkar chuan Mizoram bikah March 22-29 thleng lockdown a puang bawk. March 24 khan Prime Minister chuan India ram pumah lockdown ni 21 chhung a puang ve leh a ni. Hetihlai hian Aizawlah chuan lockdown mai ni loin, March 25, zan dar 9 aṭang khan curfew puan a ni.