Van Gogh lemziak Dutch museum aṭangin an ru
Kum zabi 18-na laia Dutch lemziak thiam Vincent Willem van Gogh lemziah 'Spring Garden' chu Laren-a Singer Laren Museum aṭangin rukruin an ru chhuak.
Van Gogh lemziah hi an ram huna Thawhṭanni zing dar 3.15 vela rukchhuah niin Police-te chuan an sawi a ni. Singer Laren Museum hi hri leng vangin khar a ni a, director Jan Rudolph de Lorm chuan a lawm lo hle tih a sawi bawk. 'Spring Garden' hlut zawng tur hi hriat a la ni lo a, mahse hlu hle tura ngaih a ni.
Singer Laren Museum hi kum 1950-a din kha niin US artist William Henry Singer leh a nupui Anna-te kutchhuak pholanna turin a tirah tak chuan an din a ni.
Netherlands-ah hian Thawhṭanni thleng khan Dutch health ministry tarlan dan chuan Covid-19 kai 11,750 awm tawhin mi 864-in an thihpui tawh bawk.
Vincent Willem van Gogh
Dutch lemziak thiam Vincent Willem van Gogh hi kum 1853 khan piangin a dam rei lo hle a, kum 1890 khan kum 37 mi chauh niin a thi a ni.
A dam chhung rei lo hle mah se a sulhnu erawh a ropui hle thung a, khawvel lemziak thiam lar ber ni turin a hming a chher hman.
Sorrow (1882), The Potato Eaters (1885), Sunflowers (1887), Bedroom in Arles (1888), The Starry Night (1889), Portrait of Dr. Gachet (1890) leh Wheatfield with Crows (1890)-te chu a lemziah lar zualte an ni a, a kut chhuakte hi khawvelin a ngaihlu hle a ni.