American Idol Season 18 chhunzawm thei lo
American Idol Season 18 chu coronavirus leng karah hun eng emaw chen kalpui mah se an chhunzawm thei ta bik lo a, production pawh an chawlhsan rih a ngai ve ta.
Khawvel ram hrang hrangah hripui leng vangin film leh TV production tam tak tihtawp a nih karah American Idol Season 18 hi hun eng emaw chen chu kalpui mah se tunah chuan a buatsaihtu lamin tihtawp rih an rel ve ta thung a ni.
Katy Perry, Luke Bryan, leh Lionel Richie-te chu Americal Idol SE18-ah hian judge an ni a, Ryan Seacrest chu show host la ni zelin Bobby Bones chu in-house mentor a ni bawk.
February 16 aṭang khan an tichhuak ṭan a, ABC chuan a season thumna atan an pechhuak leh a ni. Top 20 thleng an thlang chhuak tawh a, mahse hripui leng vanga an chhunzawm theih tak loh avang hian contestant-te pawh an in lamah an haw tir vek tawh a ni.
American zai intihsiakna hi kum 2002 aṭang khan buatsaih ṭan a ni a, season 15 kalpui a nih hnuah an chawlhsan lailawk a, kum 2018 aṭang khan an chhunzawm leh a, Fox-in an pekchhuah ṭhin chu kum 2018 aṭang hian ABC-in a lachhawng thung.
American Idol hmasa ber chu Kelly Clarkson a ni a, he intihsiakna aṭanga lar chhuak hi zaithiam an tam tawh hle a, chung zingah chuan Adam Lambert, Carrie Underwood leh Chris Daughtry-te pawh an tel a ni.