Turkish legend-in Covid-19 a kai
FIFA World Cup 2002 en pha chuan Turkey-in pathumna dinhmun an luah nana goalkeeper ṭangkai Rustu Recber kha an theihnghilh kher lo ang - Turkish legend hi vanduaithlak takin Covid-19 kai zingah a tel.
Kum 46 mi goalkeeper hlui hi damdawi inah a awm mek a, a nupui Isil Recber chuan instagram lamah an pa dinhmun hi pholangin, "Rang tak maia he hri leng lanchhuahna amaha a rawn awm dan khan min ṭhawng takzet a ni," a ti.
Rustu Recber-a nupui hi an fate pahnih nen test neih ve nghal a ni a, mahse vanneithlak takin anni erawh coronavirus hi an kai hman lo thung.
Recber-a khelh ṭhinna Fenerbahce chuan, "Dam leh thuai turin kan duhsakna kan hlan che a ni," an ti a, season khat a lo khelh tawhna Barcelona chuan, "Rustu dam thuai ang che. Kan hmangaih che a, Barca chu i lamah kan ṭang tlat a ni," tiin thuchhuah an siam ve bawk.
Turkey tana vawi 120 inlan thei Recber hian a vanglaiin Barca tan season khat a khelh bakah an ram club ṭha Fenerbahce leh Besiktas-ah te hun a hmang a, kum 2000 chho kha Turkey vanglai niin major tournament-ah pawh an che ṭha thei hle.
Euro 2000-ah quarterfinal an lut hnuin World Cup 2002 leh FIFA Confederations Cup 2003-ah pathumna an ni ve ve a, Euro 2008-ah semifinal an lut bawk.
World Cup 2002-ah hian All Star Team-ah a tel pha a, kum 2002 vek hian UEFA Team of the Year-ah a hming a lang bawk a ni.