MZU Southern Campus kan duh tâwk lo Eastern, western campus din zel kan tum - CM

MZU Southern Campus din tur leh Bru-te Tripura-a an awm nghehna tur lawmna nimina MSU-in Chanmari YMA Hall-a an buatsaihah thu sawiin Zoramthanga chuan, "University pakhat mai ni loin, campus kan nei tur hi a lawmawm. Hemi atana tun hma aṭanga lo beitute zawng zawng kan fak a, a lawmawm kan ti. Kan sorkarah pawh a bik takin minister incharge Pu Thangtea'n theihtawp a chhuah a, a fakawm," a ti a; Minister Dr R Lalthangliana beihna a zarah thui tak a kal a, amah pawhin theihtawpa a beih thu a sawi.

Chief Minister chuan, MZU Southern Campus din a ni tur chu zirlaite tan leh ram tan thil lawmawm tak a nih thu sawiin, infrastructure din kawngah theihtawpa chakin sorkarin hma a lak dawn thu a sawi a, "Southern campus hnuah a tawp mai dawn lo. University dang din a buaithlak si a, eastern campus, western campui, khawi lai emawahte pawh din zel kan tum. A chak thei ang berin theihtawpin hma kan la dawn," a ti.

Bru chungchangah Zoramthanga chuan, kum 1993-1997 vel khan Bru lehkhathiamte'n Chaltlanga an inah an hmuh ṭhin thu sawiin, "An hnam din chhuahna atan engtin nge an awm ang tih min zawt ṭhin a, Tripura, Assam leh Mizoramahte an awm darh avangin an awmna apiangah minority an ni a, huaisen leh chak thei loa an awm ṭhin thu ka hrilh ṭhin. Rêng lal an neihna Tripura chu an ram dik tak a nih avangin khuta awm khawm a, district council-te nei a, vote hlâwm nei turin ka fuih ṭhin a ni," tiin a sawi.

CM Zoramthanga chuan, a hnu lawkah 'Tuikuk zawng zawng chhuk vek tur' tih a nih thu sawiin, "Ka sawi vang pawh ka ti lo a, a ni lo pawh ka ti lo. An chhuk chhan kha tu emaw thah vang a ni lo. A bul inṭanna chu nationalism a ni. A rawttu ber pawh an inhre lo. Refugee angin an inchhál a, Mizoin min tiduhdah tih ngawt loh chu chhuanlam tur an nei lo," a ti. Bru-te chuan Tripura-a awm hlen chu ṭha ti mah se, Mizoram lama lêt loh rawt ngam erawh an awm lo niin a sawi bawk. 

Chief Minister sawi danin, nikum khan Bru hruaitute leh hnam dangte'n amah (Zoramthanga) an hmu a, Tripura-a awm nghehna tura ṭan la turin an ngen. Mizoram sorkar pawhin an awm ngheh a duh a, Tripura sorkar leh Ministry of Home Affairs (MHA) erawhin an duh lo. Bru-te Tripura-a awm hlentir an nih loh thulha PIL thehluh tur pawh Mizoram sorkarin a duang vek a, mahse, PIL thehluh ngai loin, Bru-te chu Tripura-ah awm hlentir turin inremna a awm ta a ni.

Inkhawmah hian Higher & Technical Education (HTE) minister Dr R Lalthangliana pawhin thu sawiin, MZU Southern Campus din theih a ni ta chu lawmawm a tih thu a sawi a, "Kum khat chè chê kan sorkar a nih laia hetiang kan tawng hi Lalpa'n thil ropui min tihsak a ni. Kan Chief Minister hmalakna a nih avangin a chhuanawm ka ti hle. Tuikuk chungchangah hetiang thil kan han tawng hi hnam thil tak tak a ni," a ti. 

Inkhawm hi MSU vice president J Lalmuan­zuala'n a kaihruai a, MSU president Vanlalliana Khiangte leh MSU Regional Hqrs., Lunglei presi­dent Lalramnghinglova te pawhin thu an sawi. 

    Chief Minister thusawi Ṭhenkhat

1    MZU western campus, eastern campus, khawi emaw laiahte pawh din belh zel kan tum.

2    MZU Southern Campus-a infrastructure din kawngah theihtawpa chakin sorkarin hma a la dawn.

3    MZU Southern Campus dinna atana tun hma aṭanga beitute zawng zawng kan fak.

4    Bru-te Tripura-a awm khawm turin ka fuih ṭhin.

5    Bru-te Tripura-a an chhuk chhan kha nationalism vang a ni.

6    Tripura-a an awm hlen theihna atana ṭanpui turin min sáwm.

7    Tripura-a awm hlentir ni dawn lo se chuan PIL thehluh tum a ni.