Ito tan Djokovic a thiam lua

Australian Open champion lai Novak Djokovic chuan nimin khan second round-ah Tatsuma Ito a hneh a, Serbian tlangval tan third round lut turin harsatna a awm lo - Zirtawpniah Yoshihito Nishioka nen an inhmachhawn leh ang.

Rod Laver Arena, Melbourne Park-a inkhelah seeded pahnihna Djokovic hian darkar khat leh minute 35 chhung lekin wildcard hmanga inlan Ito hi 6-1, 6-4, 6-2 in a hneh.

Grand Slam vawi 17 champion tawh hian Japanese player lakah a service a hloh miah lo a, a match lehpeka a tum tur pawh Japan tlangval tho a ni. Djokovic-a'n a match hmasa berah set a hloh a, tun ṭumah erawh kawng engkimah a chungnung.

Kum 32 mi Djokovic chuan, "A zawnin Japanese player ka hmachhawn dawn, third round-a ka khingpui tur Nishioka hi mipa tennis player che rang berte zinga mi a nih avangin fimkhur a ngai dawn hle," tiin a sawi.

Nimin inkhel dangah seeded pariatna Matteo Berrettini chu Tennys Sandgren lakah a chak lo a, Italian tlangval hi tun inelna neih laiah chuan mipa player ranking nei sang thla hmasa ber a ni. American tlangval, world number 100-na

Sandgren hian inkhel hmuhnawm takah 7-6 (9-7), 6-4, 4-6, 2-6, 7-5 in hnehna a chang. 

Seeded parukna Stefanos Tsitsipas erawh a vannei, a khingpui tur Philipp Kohlschreiber a inlan theih loh avangin inkhelh hah ngai loin a tlang. Inelna buatsaihtu lam chuan German tlangval hi tihrawl na vanga inlan thei lo a nih thu an sawi.

Greek tlangval Tsitsipas hian season hmasa Australian Open-ah khan Roger Federer a hneh a, kuminah pawh mipui mit fukna zinga mi a ni phak. A match lehpekah chuan Wimbledon finalist hlui Milos Raonic nen an inkhel leh ang. Canadian star Raonic hian Cristian Garin chu 6-3, 6-4, 6-2 in a lo hneh ve thung a ni.

Vawiin hian second round khelh chhunzawm a ni dawn a, tlai lamah world number 1 leh seeded pakhatna ni bawk Rafael Nadal chu Argentine tlangval Federico Delbonis nen an inhma-chhawn ang.