Mizoramah Bangladesh foreigner Man leh hnawh chhuah la awm lo

Assembly session neih mek­ah Bangladesh aṭanga dan loa Mizorama pém lut chhui chhuah emaw, Mizoram aṭanga hnawh chhuah emaw an la awm loh thu tarlan a ni.

Kum 2009-ah sorkar laipuia Ministry of Home Affairs-in Bangladesh mi, dan loa Mizorama pém lutte mana hnawh chhuah dan tur bawhzui tura Mizoram sorkar a hriattir angin, Mizoram sorkara Home department chuan ramri depa awm district pathum - Lunglei, Lawngtlai leh Mamit district-ahte August 13, 2015 khan Special Task Force Committee on Detection, Detention and Deportation of Illegal Bangladeshi Migrants a din a ni. District pathumah hian sub-division level committee din a ni bawk.

Assembly session neih mekah ZPM Legislature Party member Andrew H Thangliana zawhna Home minister Lalchamliana'n ziaka a chhan danin, Special Task Force chuan Bangladesh aṭanga dan loa Mizorama pém lut chhui chhuah emaw, hnawh chhuah emaw an neih report an la thehlut lo tih tarlan a ni a; tun dinhmunah sorkarin foreigner tribunal din tumna a neih loh thu pawh tarlan a ni.

Lunglei, Lawngtlai leh Mamit district tih loh district dangah dan loa Mizorama lut Bangladesh mi man leh hnawh chhuah hna chu district police kuta dah a nih thu Home Minister chuan a tarlang bawk.

Hetih lai hian, Census office chuan, kum 2001 chhiarpui leh 2011 chhiarpui inkarah Mizoramah Chakma 25,689-in an pung niin a chhinchhiah.

Census office-in a chhin­chhiah danin, kum 1951 aṭangin kum 10 dan zelah Mizorama Chakma pun dan chhinchhiah a ni a; kum 1951-ah Chakma 15,297 an awm laiin, kum 2011-ah chuan 96,972 an awm.

Kum 10 dana Chakma an pun nasat ber hun chu kum 2001-2011 chhiarpui inkarah a ni a, mi 25,689-in an pung. Kum 1971-1981 inkarah mi 17,245-in an pung a, kum 1991-2001 inkar­ah mi 17,066-in an pung. Kum 1981-1991 inkarah mi 14,579-in an pung a, kum 1951-1961 inkarah mi 4,040-in an pung a ni.