KHAWTHLIR

Assembly session neih mekah School Education minister Lalchhandama Ralte chuan INC member Lalrindika Ralte zawhna ziaka chhángin, December 2018 (MNF sorkar hnu) aṭanga January 2020 chhungin Aizawl khawpui chhung­ah hmun dang aṭangin sorkar sikula zirtirtu 109 sawn luh a nih tawh thu a tarlang. Zirtirtu Aizawla sawn luhte chu - primary school zirtirtu 53, middle school zirtirtu 41, high school zirtirtu 12 leh higher secondary school zirtirtu pathum an ni.

February 22, Inrinni khan KṬP, Bethlehem Branch chuan an din champha vawi 55-na pualin an kohhran hall-ah blood donation camp an huaihawt a, Synod Hospital tan mipa 35 leh hmeichhia pasarihte'n thisen unit 42 an pe. KṬP, Tuikhuahtlang Branch pawhin an din champha pualin Inrinni vek khan Aizawl Civil Hospital tan thisen unit 41 an pe a, a petute mipa 36 leh hmeichhia panga an ni.

Assembly session neih mekah General Administration changtu chief minister Zoramthanga chuan ZPM member Lalduhoma zawhna chhángin, The Mizoram Maintenance of Household Registers Bill, 2019 chu Indian Constitution-a Article 200 hnuaia President of India ngaihtuah tura Governor-in a thawn ang angin sorkar laipui ngaih­tuah tura a la awm mek thu a tarlang a, "Sorkar chuan a ṭul ang zelin hma a la chho ang," a ti.

Synod Social Front 

chuan February 22, Inrinni khan Synod Office-ah ruihhlo leh HIV/AIDS campaigner orientation programme an buatsaih a, kohhran mite leh ruihhlo leh HIV/AIDS chungchanga hma latu pawl aiawhte an tel. Chawhmaah ruihhlo chungchang zirho a ni a, chawhnu lamah HIV/AIDS zirho a ni.

Mizoram Baptist Koh­hran (BCM) Pastoral department chuan Feb­ruary 22, Inrinni khan BCM Lunglei Venglai Kohhranah 'Consultation on Church Growth & Expansion' thawh hnihna an buatsaih a, Lunglei North huam chhunga kohhran upate an tel.