Sarâng quintal 13 chuang man a ni tawh

Aizawl Municipal Corporation (AMC) chuan, Aizawl khawpuiah sarâng ip (plastic bag) pan chi (polythene, etc.) khapna a bawhzui zelnaah chawlhkar liam ta thleng khan micron 50 aia pan sarâng quintal 13 chuang an man tawh.

AMC hian August 2019 aṭangin sarâng, a chhah zawnga micron 50 tling lo hman a khap ṭan a, khauh zawkin August 2019 aṭangin khap a ni. AMC-a thawkte chuan sarâng micron 50 aia pante chu an man ṭhin a; chawlhkar liam ta thleng khan sarâng quintal 13 chuang an man tawh a ni.

AMC chuan Aizawla veng hrang hrangah sarâng ṭhat loh dan te, leilung a tihchhiat dante leh mipuiin sarâng an hman loh a ṭul thute puangzarin awareness campaign an nei ṭhin a, AMC councillor-te leh official-te bakah, tlawmngai pawl ṭhenkhatte an kal ṭhin.

AMC hotute chuan, Plastic Waste Management Rules, 2016 leh AMC Plastic Waste Management By Laws, 2019-in a phût angin, sarâng micron 50 tling lote chu Aizawl khawpuiah zawrh, lei leh hman khap a nih avangin, thupek zâwm lote man leh chawitirna tur chu By-Laws-ah ziah a nih thu an sawi.

AMC mayor PC Lalhmingthanga chuan, sarâng ip khap chin bawhzuinaa hma latu bik Special Committee din a ni tawh tih a sawi a; AMC commissioner K Laldingliana pawhin, sarâng khap chu mipuiin an zâwm ṭha ṭan viaua a hriat thu sawiin, "Tunah hian Aizawl khawpuia bazar kal ṭhin mi pangngai chin chuan polythene an khai tawh meuh lo," a ti.

Aizawl mayor PC Lalhmingthanga chuan, sarâng an khap chu a chhah zawng micron 50 tling lote chauh a nih thu leh Aizawlah chauh kalpui a la nih thu a sawi a; India ram state tam takah chuan state pumah khap a nih thu sawiin, Mizoram hmun dangah pawh khap ve a nih theih nan Mizoram sorkarah hma la tura an ngen tawh thu Vanglaini palai a hrilh.

PC Lalhmingthanga chuan, National Green Tribunal (NGT) thupek angin October 2, 2019 aṭangin Aizawl khawpui chu Plastic Free City-a puan a nih tawh thu a sawi a, "AMC-ah hma latu bik Special Committee din a ni tawh.

Khawvelah leh India ramah plastic ṭawih thei lote'n leilung an tichhe nasa tawh hle a, hei vang hian India sorkar pawhin nasa taka hma lain, plastic ṭangkai taka kan lo hman ṭhinte thlâkna tur bio-degradeable bag pawh ṭhahnem tak siam chhuah mek zel a ni," a ti.

AMC Commissioner chuan, plastic bawlhhlawh bik paih dan turah, sarâng bawlhhlawhte chu chhung tinte'n uluk taka fûnin, bawlhhlawh paih motor-a paih theih ní bik siamah paih hram hram ṭhin se an duh thu an sawi.