Bairabi-a checkpost siam dan tur enfiah

Bairabi South Village Council leh YMA, Bairabi South Branch hruaitute chuan January 21, Thawhlehni khan ILP checkgate chungchangah sorkar official-te nen joint verification an nei.

Joint verification hi Tlawng lui behchhana hnam dang permit nei lo, Mizoram chhunga nasa taka an lut ṭhin leh sumdawnna him lo a awm ṭhin avanga ILP checkgate siam tura Kolasib DC-a ngenna an thehluh bawhzuina a ni.

Bairabi khawtlang hruaitute hi Kolasib SDC hoin hmalak dan tur an sawiho a; Bairabi chu ramri depa awm, Tlawng lui hmanga ṭhenawm ramri nena inkalpawh theih a nih avangin Bairabi-a Tlawng lui kamah ILP checkpost emaw, Police/Forest check­post emaw mumal tak siam ngei a ṭula hriat a ni.

Bairabi khawtlang duhna chu tihhlawhtlin theih a nih chuan, Bairabi South Ramthar Veng kai chu checkpost siamna atan hmun remchang tak nia an hriat thu an sawi.