Federer tan clay court season a tawp

Roger Federer chu a khup hliam zai a ngai dawn a, hliam vang hian hun eng emaw ti chhung chu a chawl rih ang. Swiss star hi kumin clay court season bikah chuan a hmel kan hmu lo tluan dawn tihna a ni.

Grand Slam vawi 20 champion tawh Federer hian season dangah pawh clay court inelna a hmachhawn tam ngai lo. Kuminah pawh inelna lian French Open chauh a khelh tur thu a lo sawi tawh, tunah erawh Paris khawpuiah pawh a inlan thei dawn lo.

French Open bakah a hma lama inelna - Dubai, Indian Wells, Bogota leh Miami-ah te Federer hi a hmel kan hmu dawn lo, a inkhelh thiamna grass court lamah erawh a inkhelh theih ngei beisei a ni thung.

Kum 38 mi Federer chuan, "Hun rei vak lo aṭang khan ka khup ding lam na hian harsatna min siamsak, tunah chuan a damna tura enkawl a ngai. Tennis khelh leh thuai theih ka chak takzet a, grass court lamah kan inhmu dawn nia," tiin a sawi.

Federer hi a kum a tam deuh tawh a, tun hnaiah hlawhtlinna lian a chang hleithei ta lo. Season hmasa khan Wimbledon final lut mah se Novak Djokovic a ngam lo, kumin January thla a khelh zawh tak Australian Open-ah pawh khan semifinal-ah Serbian tlangval Djokovic bawk a ngam lo.

Season hmasa khan Federer hian 2015 hnua a vawi khat nan French Open a khel a, semifinal thleng mah se final a lut lo. Kuminah hian Rafael Nadal chuan Paris-ah a vawi 13 nan champion a tum dawn, hlawhtlinna a chang a nih chuan major title lak hnem lamah Federer a tluk chiah ang.