Kanye West hming a langsar Lauren Daigle-in nomination pahnih a hmu

Kar hmasa khan 2020 Billboard Music Awards nomina­tion list tarchhuah niin, Christian music category-ah Kanye West a che ṭha ber a, Christian music kaihhnawih category zawng zawngah nomination a hmu. Kirk Franklin chu nomination hmu tam zingah telin For King & The Country leh Lauren Daigle-te chuan nomination pahnih ve ve an hmu.

Christian music category hrang hranga Kanye West hming langsar taka a lang hi mi tam tak chuan pawm thiam harsa an la ti mai thei. Khawthlang lam Christian music news tarlanna website ṭhenkhatah pawh Kanye West hming hi an sawi uar lutuk hlawm lo. Mahse Billboard award sem turah erawh Christian music kaihhnawih category zawng zawngah a hming a lang vek a, a langsar fal hle.

Top Gospel Song category-ah phei chuan a hla pali ngawt a lang a, Kirk Franklin 'Love Theory' tih loah chuan Kanye West hla vek hi a lang a ni.

Nikum leh kumin Grammy Awards leh Dove awards semnaa che ṭha tak Kirk Franklin chuan Top Gospel Artist, Top Gospel Album leh Top Gospel Song-ahte nomination a hmu a, For King & Country chuan Top Christian Artist leh Top Christian Song-ahte nomination an hmu bawk.

'You Say' hitmaker Lauren Daigle chuan Top Christian Artist leh Top Christian Song category-ah nomination a hmu a, Hillsong United pawhin category pahnihah nomination an hmu bawk a ni.

Mizo tana category ngaihnawm 

Top Christian Artist Mizote tan chuan Top Christian Artist leh Top Christian Album hi category ngaihnawm a nih a rinawm. Top Christian Artist-ah hian Mizo-te pawhin an zai kan ngainat tak tak Lauren Daigle, Elevation Worship, For King & Country, Hillsong United leh Kanye West-te an dahkhawm a, tu berin nge award dawng dawn hriat a chakawm tawh hle.