Israel-in missile defence system enchhin

Israel defence ministry chuan Thawhlehni khan hlawhtling takin multi-range missile-defence system an enchhin tih sawiin, hei hian aram hmar leh chhim lam ramriah an hmelma hlun Iran leh a thurualpuite laka venhimna ṭha zawk a pe thei dawn tih a sawi. 

Israel hian Gaza Strip-a Palestinian firfiak pawlte leh Iran thlawp, Lebanon-a Hezbollah pawl leh Iran aṭangin rocket leh missile hmanga beih a tawk fo a ni. 

Defence official-te chuan Iran-in hmun hla zawk kap thei tur ralthuam a siam mek te, Hezbollah-ten Israel ram khawi hmun pawh kap pha tur guided missile lakluh an tum mekte chu thil ngaimawhawm tak a nih thu an sawi. 

US nena thawk dunin Israel hian missile defence hi eng emaw zat an siam a, Thawhlehnia test pawh hi US Missile Defence Agency nen an buatsaih a ni. 

Mediteranean Sea chungah test hi neih niin, he system hmang hian drone aṭangin ballistic missile range lian leh sei zawk chu a lo kap thei dawn em tih enchhin a ni. Defence contractor Rafael-a air and missile defence division hotu, Pini Yungman chuan an enchhinna hi a hlawhtling hle tih sawiin, target-te pawh kah puah vek a nih thu a sawi a ni.