Covid-19 veite chhuahtir dan tur Kaihhruaina thar tihchhuah a ni

Health & Family Welfare department chuan, Covid-19 vei leh enkawl dam tawhte chhuahtir chungchanga Mizoram bika hman tur duan thar, 'Discharge Protocol for Covid-19 Patients' chu September 25, 2020 khan a tichhuak.

Discharge Protocol hian Covid-19 vei vanga dedicated covid hospital, dedicated covid health centre (DCHC), covid care centre (CCC) leh home isolation-a awmte a huam vek a; sorkar laipuia Ministry of Health & Family Welfare-in inkaihruaina a siam zûlzui siam a nih thu leh, Mizoram tana him leh ṭha ber tur ngaihtuah chunga siam a nih thu, sorkar thuchhuah chuan a tarlang.

I.    Natna lang chhuak lote:

    Natna lang chhuak lo zingah natna hrik hmuh chhuah a nih aṭanga ni 10 chhung chu uluk taka enthlak an ni ang. Ni 10 ní-ah Rapid Antigen Test (RAT) tih nawn tur a ni.

1.    Ni 10 nía RAT result a negative chuan COVID-19 hri kai chu chhuahtir (discharge) theih a ni a, amaherawhchu, uluk takin a inenkawl (strict self-monitoring) chhunzawm ngei tur a ni.

2.    Ni 10 nía RAT result a la positive chuan COVID-19 hri kai chu ni 4 (li) dan zelah RAT tih tur a ni. RAT result a negative hnuah chauh chhuahtir theih a ni ang a, uluk takin a inenkawl chhunzawm tur a ni.

3.    RAT result chu ni 20-naah pawh a la positive chuan enkawltu doctor-te'n District Core Team for Covid Treatment an ráwn ang a, anni hian a ṭul angin ZMC Core Team-te an ráwn leh ang a, kalpui zel dan tur an rél ang. Aizawl district bikah chuan enkawltu doctor-in a ṭul dan azirin ZMC Core Team an ráwn ang.

II.    Asymptomatic Home Isolation:

    Covid-19 hri kai natna lang chhuak lo, mahni ina awmte chu swab sample lak ní aṭanga ni 10 chhung uluk taka enthlak an ni ang a, ni 10 ní-ah RAT tih tur.

1.    Ni 10 nía RAT result a negative chuan chhuahtir theih a ni a, uluk takin a inenkawl chhunzawm ngei tur a ni.

2.    Ni 10 nía RAT result a la positive chuan ni 4 dan zelah RAT tih ziah tur a ni. RAT result a negative hnuah chauh dama ngaih an ni ang a, discharge/ enkawlna tihtawp theih a ni a; uluk takin inenkawl chhunzawm tur a ni.

3.    RAT result hi ni 20-naah pawh a la positive chuan enkawltu doctor-ten District Core Team for Covid Treatment an ráwn ang a, anni'n a ṭul angin ZMC Core Team an ráwn leh ang a, kalpui zel dan tur an rél ang. Aizawl district bikah chuan enkawltu doctor-in a ṭul dan azirin ZMC Core Team an ráwn ang)

III.    Natna lang (symptomatic moderate):

    COVID-19 hri kai natna lang chhuakte zingah natna a lan chhuah aṭanga ni 10 nía a tàwp ni thum chhung emaw, a aia rei emaw khawsik a neih loh a, oxygen saturation 95% aia sang i.e, Spo2>95% a nih bawk chuan RAT tih tur a ni. RAT result azirin a hnuaia mi ang hian test leh enkawl chhunzawm tur a ni.

1.    Ni 10 nía RAT result hi a negative chuan chhuahtir theih a ni a, uluk takin a inenkawl chhunzawm ang.

2.    Ni 10 nía RAT result a la positive chuan ni 4 danah uluk taka ennawnin RAT tih tur a ni. RAT result a negative chuan chhuahtir theih a ni a, uluk takin a inenkawl chhunzawm ngei tur a ni.

3.    RAT result hi ni 20-naah pawh la positive mah se, a tawp ni thum chhung emaw, a aia rei emaw khawsik a neih loh a, oxygen saturation 95% aia sang, (ê95%) a nih chuan a enkawltu doctor-te'n District Core Team an ráwn ang a, anni'n a ṭul angin ZMC Core Team an ráwn leh ang a, kalpui zel dan tur an rêl ang. Aizawl district-ah chuan enkawltu doctor-in a ṭul dan azirin ZMC Core Team an ráwn ang.

IV.    Na zual & natna benvawn nei:

    (Severe, critical & immuno-compromised)

    COVID-19 vei damlo na zual leh natna benvawn neite chu ni thum chhung khawsik an neih tawh loh a, ni thum chhung an oxygen saturation 95% aia sang a nih bawk chuan, RT-PCR hmanga swab sample test tur a ni. Test result azirin a hnuaia mi ang hian test leh enkawl chhunzawm a ni ang.

1.    RT-PCR test result a negative chuan chhuahtir theih a ni a, ni sarih dang inah a inkhung hrang (home isolation) ngei tur a ni.

2.    Test result a la positive chuan, ni li hnuah RT-PCR test test tih leh tur a ni a, a la positive zel chuan ni 28 chhung chu ni 4 (li) dan zelah test tur.

3.    Test result hi ni 28 hnuah pawh la positive zel mah se, a tawp ni thum chhung emaw, a aia rei emaw khawsik a neih loh a, oxygen saturation 95% aia sang a nih chuan, doctor-te'n District Core Team an ráwn ang a, anni'n a ṭul angin ZMC Core Team an ráwn leh ang a; kalpui zel dan tur an rél ang. Aizawl district-ah chuan doctor-in a ṭul dan azirin ZMC Core Team an ráwn ang.

4.    Hri kai chhuahtir (discharge)-te in lama an haw dawnin, a enkawltu doctor-in a ṭul angin an chhungte a hrilhfiah tur a ni.

5.    Enkawltu doctor-in Covid-19 vei chhuahtirte dinhmun chu LTF/VTF hnenah a hrilh ang.

COVID-19 Discharge Protocol tlangpui

I.    ASYMPTOMATIC & HOME ISOLATION

•    Positive tih finfiah aṭanga ni 10-naah RAT hmangin swab test tur a ni a, negative-te chu chhuahtir theih.

•    Ni 10 hnua test-ah an positive chuan ni 4 danah RAT hmangin test nawn zel tur a ni a, an negative chauhin chhuahtir tur.

•    Ni 20 hnuah pawh an la positive chuan a ṭul angin mithiamte'n an ngaihtuah zui ang.

II.    SYMTOMATIC (MODERATE CASE)

•    Covid-19 positive tih finfiah ní aṭanga ni 8-10 na chhunga khawsik an neih loh a, oxygen saturation 95% aia sang a nih chuan RAT-in swab test tur.

•    Negative-te chu chhuahtir theih a ni.

•    Ni 10 hnua test-ah an positive chuan ni 4 danah RAT hmangin test nawn zel tur a ni a, an negative chauhin chhuahtir tur.

•    Ni 20 hnuah pawh la positive mah se, a tawp lam ni 3 chhung khawsik an neih loh a, oxygen saturation 95% aia sang a nih chuan mithiamte'n a ṭul angin an ngaihtuah ang.

III.    NA ZUAL (SEVERE CASE)

•    Ni 3 chhung khawsik an neih loh a, oxygen saturation 95% aia sang a nih chuan RT-PCR hmangin swab test tur.

•    Negative-te chu chhuahtir theih a ni a, inah ni 7 inkhung zui rih tur a ni.

•    La positive-te chu ni 28-na thlengin ni 4 danah RT-PCR hmangin test zel tur.

•    Ni 28 hnuah la positive mah se, a tawp lam ni 3 chhung khawsik an neih loh a, oxygen saturation 95% aia sang a nih chuan mithiamte'n a ṭul angin an ngaihtuah ang.