Pakistan eptu hotu Shahbaz Sharif an man

Pakistan eptu hotu leh PML-N president ni bawk Shahbaz Sharif chu Thawhṭanni khan National Accountability Bureau (NAB) chuan sum tihchingpen vangin an man. 

Shahbaz hi Pakistan prime minister hlui Nawaz Sharif nau a ni a, man a nih hma hian Lahore High Court chuan NAB team aṭang leh Shahbaz lawyer aṭanga thu a ngaihthlak hnuah bail a dilna chu a lo hnawlsak tawh bawk a ni. 

Kar liam ta khan Pakistan prime minister Imran Khan kaihhruai sorkar chuan Shahbaz hi sum tichingpena puhin a lakah thubuai a thehlut a ni. Sept 23 khan Adviser to Prime Minister on Interior and Accountability, Shahzad Akbar chuan Shahbaz leh a fapa pahnih Hamza leh Salman-te chu fake account hmanga sum tichingpenah puh an nih thu a sawi.

Akbar chuan financial monitoring unit, NAB chuan an chhungkaw sum inthawnna chevel 177 a chhui thu sawiin, cheng vaibelchhe tam tak chu dan dik lo hmangin an company kaltlanga an hlep thu a sawi bawk. Shahbaz hian PM Khan chuan mantir a tum hrim hrim nia puhin, Khan leh NAB chu thawkdunah a puh bawk. 

Shahbaz man a nih hma hian Pakistan-ah hian eptu hruaitute chuan kawng hrang hrang hmangin PM ban tir turin hma an la a, eptu intelkhawm Pakistan Democratic Movement (PDM) chuan an ram politics-a sumdawngte inrawlh ṭhin tihtawp a nih theih nan te, inthlan thianghlim leh felfai a awm theihna atana inthlan kalphung siamṭhat te, inthlana armed force leh intelligence agency-te inrawlh tir loh te, politics avanga tangte chhuah a, journalist-te laka thubuai siam hnuhkir te, National Action Plan hman leh China-Pakistan Economic Corridor hnuaia project-te chak zawka thawk tura hma lak a nih theih nan sorkar chu an nawr a ni. 

Media ṭhenkhat chuan eptu ten PM bang tura an nawr avang hian Shahbaz hi manna tur zawngin an man zui ve ta mai niin an sawi. Shahbaz hi kum 2013-2018 khan Punjab-ah chief minister a ni tawh ṭhin a ni.