Zaninah Brighton Vs Man United rematch

Zanin dar 12:15 hian Carabao Cup last 16-ah Brighton & Hove Albion leh Manchester United te an inkhel dawn. Team pahnih hi kartawp khan an inkhel a, Ole Gunnar Solskjaer-a hote hi 3-2 in an chak hram. Zanina an inkhelhna hmun tur hi Amex Stadium bawk a nih dawn avangin inkhelh ṭan hma hauhin boruak a nung nghal.

Man United defender Luke Shaw chuan, "Carabao Cup hi kan champion duhna a ni a, chutihrualin manager tan training-naa thawkrim player enchhinna hun ṭha a ni. Match khelh tur a tam a, player kan inthlak kual a ṭul," tiin a sawi a, hemi a nih avang hian kar tawpa inlan player-te a ngai ngaiin an inlan lo ang.

Ole Gunnar Solskjaer-a'n Luton Town 3-0 an hneh ṭumin league match-a bul ṭantute aṭangin player 10 zet a thlak a, captain Harry Maguire chiahin bul a ṭan nawn. England international defender Maguire hi season liam ta pawh khan match zawng zawngah a inlan vek a, Seagulls nen pawh team kaihruaitu a ni thei ang.

Luton Town nena bul ṭan keeper Dean Henderson, penalty khungtu Juan Mata bakah Eric Bailly, Brandon Williams, Donny van de Beek, Fred leh Jesse Lingard te League Cup-ah bul an ṭan nawn leh a rinawm. Chutihrualin Brighton nen league match an khelh ṭuma squad-a awm lo Daniel James leh Odion Ighalo te dinhmun hriatthiam a har thung.

Thawhṭannia Aon Training Complex-a team training-naah Diogo Dalot, Tim Fosu-Mensah, Teden Mengi leh Andreas Pereira te an tel vek bawk. Man United hian Pathianni zan dar 9:00-ah Tottenham Hotspur an mikhual dawn a, Premier League match pawimawh tak an hmaah a awm avangin League Cup-ah player ṭha an hahdamtir a rinawm hle.

United khingpui tur Brighton & Hove Albion-in league match vawi thum an khelh tawhah hmuhnawm takin an khel a, Chelsea leh Man United lakah point hmuh phu mah se a chak lo zawkah an ṭang. Chutihrualin Seagulls hian Newcastle United 3-0 in an sawp thei a, League Cup last 16 thleng turin Preston North End 2-0 in an hneh bawk. 

Seagulls hi Manchester United te angin an squad chhah lo mah se League Cup-ah erawh head coach Graham Potter-a'n player ṭha a awltir ve tho a rinawm. Preston an hneh ṭumin Alireza Jahanbakhsh leh Alexis Mac Allister ten goal an khung. 

Iranian star Jahanbakhsh bakah season liam taa an player pawimawh Pascal Gross leh Ajax aṭanga an lakluh defender Joel Veltman ten league-ah hmun pawimawh an chang pha lo a, Seagulls squad a chhah ve hle tihna a ni.

Graham Potter hoten kartawp khan United wood-work vawi nga zet an tih per. Solly March-a'n goal ban a pet per a, Leandro Trossard pawhin vawi thum ngawt a tih per a, zaninah goal khung tam zawk nih an tum ang.