Wolves-in club record an siam

Season liam taa Europa League quarterfinal khel thei Wolverhampton Wanderers chuan season tharah pawh tha thlah an tum lo tih an pholang a, FC Porto aṭangin Fabio Silva chu an player manto ber ni turin an lalut. 

Wolves hian kum 18 mi striker lalut tur hian pound maktaduai 35.6 an theh chhuak a, kum nga chhung an hnena khel turin contract an ziahpui bawk a ni. 

Porto tana league match khel thei naupang ber record chelhtu hi Wolves chairman Jeff Shi chuan, "Portugal Under 16 tana a khelh lai aṭang tawhin kan recruitment team-te chuan an thlithlai reng a ni.

"European football-a a kum rualpui zingah chuan number 9 ṭha ber niah an ngai. Fabio hi player naupang tak leh thiam bik a ni a, a kum zat ngaihtuaha game a thlir thiamna te hi top class a ni," tiin a striker thar chu a duh vet vet hle. 

Silva hian kum 17 leh ni 22 mi niin August 2019 khan Porto tana a match hmasa ber a khel a, September 2020-a herchhuah meuh chuan Wolves player manto ber a ni ta. 

Wolves player manto ber ni ṭhin chu Raul Jimenez a ni a, Mexican striker hian kum 2019 khan Benfica aṭangin Wolves hi pound maktaduai 30-in a zawm a ni.