Zanin dar 12-ah DFL Super Cup Bayern Munich Vs Borussia Dortmund

German football-a club langsar pahnih Bayern Munich leh Borussia Dortmund te zanin dar 12:00 hian Allianz Arena-ah an inkhel dawn. Team pahnih inhmachhawnna tur hi DFL Super Cup tih a ni a, Bundesliga champion leh DFB Pokal champion an inhmachhawn ṭhin.

Season liam ta khan Bayern-in Bundesliga leh German Cup nomawi an chawi avangin league-a pahnihna Borussia Dortmund an khel dawn. Kum 2019 DFL Super Cup kha Signal Iduna Park-ah khelh a ni a, Dortmund 2-0 in an chak.

Tun season-ah Bayern leh Dortmund te hi Bundesliga nomawi inchuh ber tura ngaih an ni a, amaherawhchu kartawp khan mak maiin club pahnih hi an chak lo ve ve. Bavarians hian Hoffenheim 4-1 zetin an hneh lo a, Dortmund pawh hi Augsburg lakah 2-0 in an tlawm a, Super Cup- hi team ṭha pahnihin thawhchhuah tum nan an hmang ang.

Hansi Flick-a'n Hoffen-heim lakah striker Robert Lewandowski bench-ah a dah a, Dortmund hmaah erawh Polish striker hian bul a ṭan ngei a rinawm. Lewy dang turin Bayern defender hlui Mats Hummels a pawimawh dawn. 

Kum 31 mi Hummels leh Lewy te hi Dortmund-a hming chher hnuah Bayern pan ve ve an ni a, German defender erawh a larchhuahnaah a let leh tawh. Hummels-a'n Lewandowski a hrechiang a, Lucien Favre-a'n a tawnhriat hi a hman ṭangkai thiam a ṭul dawn a ni.

Dortmund pawhin striker ṭha bik Erling Haaland an kawl a, Bayern tlarhnung tan ven uluk a ṭul dawn. Hansi Flick-a hote hian goal an khung tam rualin goal an chhuah ve fo a, Dortmund-in hliam vangin Thorgan Hazard chawr thei lo mah se Haaland bakah Jadon Sancho, Marco Reus, Gio Reyna leh Julian Brandt te an kawl avangin tawh an khirh dawn.

English rawlthar Jude Bellingham pawhin Dortmund-ah khelhna hmun a chang nghal a, Bayern hmaah fiahin a awm ang. Bavarians lam tan match hnuhnung pahnihah Leroy Sane leh Serge Gnabry te an khel ṭha tawk lo a, Super Cup hi insiamṭhatna hun ṭha a ni ang.